Trump-i Paris tenangzüktep atema bilemdangtsü imlar: Rajnath Singh

New Delhi, June 6 (Agencies): US tir Donald Trump-i Paris tenangzükba nung madenba osangji India atema taoksatsü osang ka liasü saka America-i iba telemtetba meyipa reprangshitsü imlar, ta Home minister Rajnath Singh-i Mongulbarnü ashi.
Anogo ananü atema ‘Capacity Building of State Disaster Response Force-2017’ tenzüktsüdang Rajnath-i “linük kati pei atema dang bilembaji tebilemtsü tulu ka lir” ta ashi.
“US tiri Paris tenangzüktep atema osang sangdongbaji asenok aser alima atema taoksatsü osang ka liasü. Ajisüaka, US-i iba telemtetba meyipa reprangshitsü imlar” ta paisa shisem.
June 1, 2017 nü US tir Trump-i Paris tenangzüktep nung parnok madenba osang sangoktsüdang, “India-i iba tenangzüktep nung shilem agibaji foreign aid sen billion sa billon dollars angutsü atema lir” ta ashi.
Yashi External affairs minister Sushma Swaraj-i Trump indang onük magizükba metetdaktsü aser lai ashiba agi, “India-i Paris tenangzüktep nung sign asübaji tanga linük kari ashiba ajanga mesüra sen atema masü.”
“Onoki alima tzümopung kümzüka ayutsü tangatetba nung sign asü. US maden yonga India-i iba tenangzüktep nung shilem ka asütsü” ta Swaraj-i osangbener dang ashi.