Trump-i refugees anema sangdongba angashia temulung raksar:Malala

New York, January 28 (Agencies) : Nobel Peace Prize angur rongnung tanutsütila, Malala Yousafzai-i, “US Tir Donald Trump-i refugee tem anema sangdongba angashia temulung raksar aser ni US Tir dang alima nung tekümzüker aser tejenokdak malirtem metokshitsü mepishir,” ta ashi.
Malala ya Pakistan nungi kaketshirtem temeden atema bendanga agüja inyaker ka lir aser 2014 küm lai kasa wadang atema nokdanger India tsür Kailash Satyarthi den külemi Nobel Peace Prize angu.
“Tanü Donald Trump-i azüdokshi aser rara nungi jena aoer tanurtem, tetsütem aser tebutem atema kishi shibangba ajanga ni temulung kanga shiranger,” ta 2012 küm linük nung tetsürtem nem kaket shisatsü agüjang ta temai adoka nokdangba ajanga taliban telungpuri tekolak nung akhala, arishi küm 19 tain, Malala-i ashi.
“Tang ama alima nung animesüngzüktet aser kechiang masüba tensa ka nung ni US Tir Donald Trump dang alima nung tekümzüker aser tejenokdak malir tanur aser tsüraburtem nem tesülen teshiloktsü ta mepishir,” ta Trump-i refugee tem anema sangdongba sülen Malala-i sangdong ka ajanga metetdaktsü.
Yousafzai ya the Nobel Peace Prize angur rongnung tanutsütila lir.
La tang ya England nung alir aser la mozü agia tajungba kümer külen alima sema campaigne-a agia jajaogo.