Trump-i sorkar inyakyim küm junga shibanga ayutsü amokmeren

Washington, Aenjeti/January 5 (Agencies): United States tir Donald Trump-i Hokolbarnü, Congress-i Mexico arrtsü nung jara yanglutsü asoshi senotsü agütsütsü atema memulungra, tang sorkar inyakyim shilem kar hopta anabuba shibanga aliba ya maneni küm junga shibanga ayutsü amokmerenogo.
Congressional lenirtem den White House nung senden ka akaba sülen Trump-i ashiba agi, pai arrtsü nung jara yanglutsü atema national emergency ka benoktsü akok, koba pai ashiba agi, ozüng alema linüki nisungtem senoka aitba nokdangtsü atema kanga tongtibang lir.
Trump-i osangbenertem den sensaksemba mapang pai iba o jembiba jangjashitsüogo.
“Onoki tir dang sorkar inyakyim lapoktsü asoshi nüngdaker ta shiogo, saka pai memulunger aser ashiba agi ita aika mesera küm jungaa inyakyim shibanga ayutsü,” ta Senate Minority Leader Chuck Schumer-i Trump den senden ka nung adenba sülen osang benertem dang ashi.
House Speaker Nancy Pelosi shiba iba senden nung dena liasü, lai srokar inyakyim lapoktsü nüngdakba lemsatepa liasü.
“Onoki Tir dang sorkar inyakyim melapokra iba tebilemtsü mebentettettsü ta shiogo. America nunger mapatem bangdaka dokja lir, iba den itasen magütsür aser iba tebilemtsü mebentetra border security kangshitsü,” ta Pelosi-i ashi.
Kasa mapang nung osangbenertem den sensaksemba mapang sorkar inyakyim shibanga ayutsü amokmerenba dak sendakba nung Trump-i jembia liasü.
“Iba ya mataloktsü saka ni renema lir aser House aser Senate nung Republicans pur atema jembitettsü. Tekümzükba linük ka asoshi parnoki kanga jembir aser arrtsü ka aliba ajanga iba ya bentettsü. Arrtsü melira linük ka mali ta ni aiben shiogo. Iba mepetmesü ya anogo talangkabo atsülanga maotsü ni imlar,” ta pai ashi.
Trump-isa, national emergency kübok pa indang constitutional provisions amshia arrtsü nung jara yanglutettsü.
‘Onoki national emergency benoktettsü, kechiyong iba ya linük tekümzükba dak sendaka lir. Ni ibaji minyak saka ni inyaktsü akok. Saka onoki emergency benoka jara ya takaratiba nung yanglutettsü akok, koba lenmang tanga ka lir. Saka tebilembatem lemsatepa inyaktetra ta sür onoki merangdangdar,” ta Trump-isa ashi.