Trump-i Stallone nem ‘National Endowment for the Arts’ mapa inyakdaktsünür

December 17, 2016 (Agencies) : US Tir asütsü shimteta alisang Donald Trump-i Sylvester Stallone nem National Endowment for the Arts nung mendenbuba inyakdaktsünür.
Osang ajanga ashiba agi Rocky shilem agisang Stallone nem US Tir asütsü shimteta alisang Donald Trump-i iba mapa agütsüba ajanga aikati tenük yoktsü.
Brihoistibarnü osangbenertemi Dailymail.com den jembidang, Trump-i arishi küm 70 tain, Stallone dang purapitetba project aser sempet tajung keta aliba nüburtem yaritsü asoshi tenla ketdang asüba, federal agency, National Endowment for arts nung mendenbuba inyaktsü atema asüngdangogo, ta ashi.
Trump-i Hollywood nung actor tejen Stallone-i ‘creative arts’ tali renlokdaktsütsü imlar aser Stallone-ia iba mapa agizütsü asoshi bilemdangdar. Ajisüaka pai iba mapa agizük yonga congress nungi tama temelaba agitsü nüngdak, ta kasa osang ajanga ashi.
“Trump-i kenten-menü tsütsü temulung kangabo magütsütsü südi ta nüburtemi bilemer, saka pai iba ama nüngtugu nisung shimba ji industry-i nüngtakba lir,” ta osang kar ajanga ashi.
US nung mapang talangka Republican party pusemsang, Stallone ya tawa US nung Tir menden atema toktepsang Trump pusemer celebrity ishika rongnung densema liasü. Ajisüaka Stallone-i Trump Tir mendeni atutsü atema nübuyimba aser pa ajungkettsüba maparen anenatok. Tesüiba mapang Stallone-ia pa politics nung ajemoktsü jangrar, ta shia liasü.
“Ni Donald Trump meimer”, ta Stallone-i Variety dang ashi.
2008 election nung Republican candidate John McCain yarisang aser ‘Rambo’ film nung shilem agisang, Stallone-i Hollywood nungi politician üma California nung küm ti angh inyaksang, Arnold Schwarzenegger, tsüngsü nung jajaner, ta shisem.