Trump-i Syria aser Russia dang Idlib amakba anentsü ashir

London, Aami/June 03 (Agencies): United States Tir, Donald Trump-i Syria sorkar aser par tembar Russia dang Syria nung tsükchirtem kübok aliba province tatembangba nung bomb pokloktsüba anentsü ashi, kong ghonda 24 tsüngta Israel-i Syria nunger anema tayimtsü amshia tanaben amaker.
“Russia, Syria aser Iran ajanga Syria nung aliba Idlib Province nung bomb poklokja tai maket civilian aika taochi melie tepseter ta osang angashir. Iba nisung tepsetba mapa ya alimai repranga lir. Ya kechi atema, iba ajanga nenok kechi angutsü? ANENANG!” ta Trump-i Twitter nung zülutsü. Trump’er administration ajanga Israel-i Syria nung tayimtsü amshia amakba mapang talangka nungi buküma arur.
Idlib nung Syria sorkari ita ka dak tali makyonga aruba nung maneni yaritsü, ta Moscow-i Hokulbarnü ashiba sülen Trump-i iba osang ya sangdoktsür.
Idlib nung aliba tsükchirtemi civilian aser Russia nunger dak lendong agütsüba anentsü ya Turkey khuret lir, ta Kremlin-i sangdong ka nung shia lir.
Russia nungeri yariba Syria sorkari par linük northwest tsütsü amokbanga aliba tsükchir dak amaker, ta Turkey Tir Tayyip Erdogan-i mapang talangka nungi aija arur.
Taoba küm tom ka nungi Syria Tir Bashar al-Assad aser par sorkar anemer tsüngta rarayonga aruba mapang Idlib nung tesashiba rarar aser rara nungi jenbutsü mechi Syria nungertem Turkey arrtsü nung prokshia aliba ajanga humanitarian crisis ajurutsü, ta tsübur.
April ita tatemlen nungi Idlib amak tenzüker tang tashinung nisung 200,000 dak tali iba tesem nungi jena ogo, ta United Nations-i ashir.
Northwestern region nung azüdokshi tali akümba atema linük balalai kecha meinyakba asoshi Syrian NGO temi Hokulbarnü ola adok.
Kasa mapang Israel-i Homs province nung mitkartem tayimtsü anenba tesem ka amak aser nisung pongu tepset, ta Syria-i Deobarnü tai tongloktsü, aser Damascus nunga mitkartem aser itdangiter aliba tesem ka nung amakdang nisung ter tepset.