Trump-i Syria nung yimtenren temelenshitsü lidaktsütsü atema inyaktsü ajungshir: UN

Geneva, November 15 (Agencies): US Tir tasenba akümtsü temeten ngua alisang, Donald Trump-i Syria nung yimtenren temelenshi tajung lidaktsütsüsa inyaktsü tajungshiba olen ka United Nations (UN)’er Syria envoy, Staffan de Mistura-i tanü, Mongolbar nü metetdaktsüogo.
“Trump-i Syria nungi Islamic State (IS) kiralongrar telok meshimeshia makdoktsüba atema Russia den aroki lungjemer inyaktsü bilembaji kanga junger. Ajisüaka, IS teloki Syria nüburtem par telok nung mezüngsemdaktsütsüsa Syria nung yimtenren temelenshi tajung bener arutsütsü atema inyaktsü ajungshir,” ta pai ashi.
“IS telok madak takok ngua raratsüji kanga dang tongtipang saka par telok meshimeshia samatsütsü atema Syria ajunga nung yimtenren tebentetbaren lidaktsütsü nungdaker. Iba tasa tasen amshiba ajanga Syria nung tesep tenteta alir IS telok madak takok angutsü,” ta Mistura-i shisem.
Syria nung tongpang rarabaren anenja, par linük nung yimtenren tebentetbaren bener arutsütsü nükjidong nung Mistura-i ayonger külen taküm, 2016 küm tomlen yimjung senden amentsü tenzük saka iba senden nungiter tongti, US Secretary of State, John Kerry aser Russia Foreign Minister, Sergei Lavrov na tsüngda tangatettep kati marutettsüsa tia ajuruba ajanga yimjung sendenji takok ngua mementeti tembangtsüsa aküm.