Trump-i takok anguba ajanga EU-US tesendaktep mejungi akümtsü akok: Juncker

Luxemburg, November 12 (Agencies): Tawa Republican yimtenren telok nungi US Tir menden abentsü temeten angusang, Donald Trump-i election nung takok ngua, US Tir tasenba akümba ajanga European Union (EU) aser US na tsüngda tesendaktep mejungi akümtsü akok ta tebilemtsü akaba olen ka EU Commission Tir, Jean-Claude Juncker-i tanü, Honibar nü metetdaktsüogo.
Luxemburg nung ayongba kaketshir mongdang ka nung onük jembidang Juncker-i iba olenji sangoktsü.
“Trump-i taruba 2017 küm January ita US Tir menden benokba sülen küm 2 tashi melalutsüsa Europe inyakyim tamasa angazüktsü nungdaker. US aser par lenirtemi Europe indang shishia mebilemer. Ajisüaka, Tir tasenba akümtsü alisang, Trump-i Europe indang meteta alitsüji kanga dang tongtipang,” ta pai ashi.
Paisa ashiba agi, Trump-i taoba mapang North Atlantic Treaty Organization (NATO) aitsüogo saka pai yamaji inyakba ajanga tensa tamajungba kümdaktsütsüsa jenjang bener arutsütsü.
Refugee aser teprangtsü temesüng sentsü masür nüburtem den sentakba nunga Trump aser Europe lenirtem na tangatetba khen yongi balala aliba olen ka pai shisem.
Juncker-i tan jembibaji Trump-i mamangtsüsa US Tir election takok anguba sülen Europe ajunga lenirtemi tebilemtsü akaba olen lemsateper lir.
US Tir election den sentakba nüboyimtsü sentong nunga Trump-i EU-i tenzükba migrant nisungtem den sentakba mapatong aitsüba osang bushiteta lir.
Ano külen, Trump-i tan Bodbar nü Democratic candidate, Hillary Clinton madak takok ngua, US Tir tasenba akümtsü temeten anguba sülen Ukraine aser kiralongrartem den sentakba onük tongtipangsüa benoka jembitsü atema EU-US Summit amentsü asoshi European Council Tir, Donald Tusk-i Trump ayongogo.