November 13, 2016: Actor, Robert De Niro-i, Donald Trump-i takok anguba sülen pai 9/11 atalokdang bilemba ama bilem, ta ashi.
US Tir election mapang nung Robert-i Trump anema jembia aru aser Hollywood Reporter den jembidang pai, “Joko pa (Trump) shimogo, anungji kechi atalokdir repranga atadi,” ta ashi.
“Trump-i takok anguba sülen pai, kiralongrartemi Twin Tower (9/11) amakdang bilemba ama bilem,” ta Robert-isa shisem.
“Kechisa atalokdir repranga atadi. Nisung aikatisa repranga atatsü,” ta pai ashi.
Taoba ita De Niro indang video ka kanga prokshia liasü aser iba video nung pai Trump ji “sowar,” “ak,” “azü’, lir ta jembia lir. Paisa, “Pai (Trump) nisugntem tejak nung kechi koma tsüngoktsütsüar iba indangji jembir. Ni-a pa dak tejak nung tsüngoktsüner,” ta jembia liasü.
De Niro-isa Jimmy Kimmel Live! sentong nung shilem agidanga Trump indang jembi. Iba sentong nungji sentong ketdangseri pa dang, nai pa dak tejak nung tsüngoktsütsü tebilemba lir asü ta asüngdanga liasü. Ibaji langzüa De Niro-i, “Ni tangbo yamaji mesütettsü, tangbo pa Tir lir. Iba mendenji ni akhümtsübutsüla,” ta langzüa liasü.
“Pai kechi inyakdir ni ibaji repranga atatsü. Yimti aika nung nisung aika kanga jashia longkak aitba asenoki angur,” ta paisa ashi.
De Niro-isa asayamenüa, pai Italy senso maongka agitsü. Ni iba jagi aotsü, ta ashi.
You must be logged in to post a comment Login