Trump-i Tatong Tir atema Pence shimogo

546651686
Republican yimtenren telok nungi US Tir menden atema candidate ama toktepsang, Donald Trump (Achijilen)-i par Tatong Tir inyaktsü asoshi Indiana Governor, Mike Pence (Abelen) shimba osang New York kübok Manhattan nung sangoktsüdang agiba noksa ka yangi angur. (New York, July 16)

New York, July 16 (Agencies): Republican yimtenren telok nungi US Tir menden atema candidate ama toktepsang, Donald Trump-i par Tatong Tir menden atema Indiana Governor, Mike Pence shimogo.
US linük madak aroki yimsü asütsü nükjidong nung Trump-i tan par Tatong Tir inyaktsü asoshi arishi küm 57 tain Pence shimba ajanga taküm, 2016 küm November ita agitsü ayongba US Tir election nung Trump-i asangsang nung Tir menden abentsü maongka angutsüsa jenjang tajungba akümtsü akok.
“Kü den aroki Tatong Tir inyaka, US madak yimsü asütsü atema Indiana Governor, Mike Pence shimba osang pelaseta sangdonger,” ta arishi küm 70 tain Trump-i yashi, Hokolbar nü sangotksü.
“Ni Trump den aroki lungjemer asen America linük temaba jenjang nung ajungkettsütsü maongka anguba atema kanga pelar,” ta taoba mapang House Republican speaker menden abensang, Pence-ia metetdaktsü.
“Trump-i pa den yariteper tajung aser America nüburtemi meima sapur lenir ka par Tatong Tir inyaktsü asoshi shimogo,” ta Democratic yimtenren teloki nungi US Tir menden atema candidate ama toktepla, Hillary Clinton-ia metetdaktsüogo.
“US nung tetsübok nung aliba tanur tepseta indokba maparen nokdangtsü asoshi nokdaker aser sorkar mapa inyaker nem agütsüba tajemtiba itasen timba küma ajungkettsütsü asoshi benokba onük anemer yimsüsür tajung ka Pence ya lir,” ta Clinton’er telokia metetdaktsü.
Ajisüaka, ken o aika nung Trump aser Pence na tangatetba meputepi balala aliba osang bushiteta lir.
Trump-i yaküm, 2015 küm tatemlen benokba Muslim nisungtem US-i mapang tatsüka atema maidaktsüi nokdangtsü onük anemer rong nung Pence-a densema aliba osang jangjaogo.
Taoba House Representatives Speaker, Newt Gingrich aser New Jersey Governor, Chris Christie na meshimi Trump-i tan Pence par Tatong Tir atema shimba osanga jangjaogo.
Republican teloki tan Deobar nü nungi tenzüka, Ohio state kübok Cleveland yimti nung agitsü ayongba Republican telok mongdang nung Republican telok nungi US Tir menden atema candidate ama toktepdaktsütsü asoshi Trump tatem küma shimtsü sentong lir.

You must be logged in to post a comment Login