Trump-i Tir election akokba ajanga terata mapang ka tenzüktsüogo: Hollande

Paris, November 09 (Agencies): Tan Mongolbar nü agiba US Tir election nung Republican yimtenren telok nungi candidate, Donald Trump-i takok ngua, US Tir tasenba akümtsü jenjang ajangzükba ajanga terata mapang ka tenzüktsüba olen ka France Tir, Francois Hollande-i tanü, Bodbar nü metetdaktsüogo.
US linük shishilembatsü linük tongti ka aliba den, Middle East nung tongpang rarabaren aser Trump-i olulu ta züdoka yutsüba alima tali tatsükba akümbaren azüoktsü mapatong nung tongti shilem agir linük aliba olen ka paisa metetdaktsü.
“Tan US Tir election agiba sülen terata mapang ka tenzüktsüogo. Iba ama tensa ajuruba mapang ka nung Europe ajunga tali lungjemshir khuret aser tebilemtsü ajunga koktetsüsa inyaktsü nungdaker,” ta shia, Hollande-i tan Tir election nung takok anguba atema Trump den pelaba olen ka lemsatepa liasü.
Taruba 2017 küm agitsü ayongba France Tir election nung jenjang mejungi alisang, Hollande ya Trump anemer ka liasü aser US Tir election nung Democrat telok candidate, Hillary Clinton-i takok angutsü ta sangokja liasü.
Ano külen, Afghanistan nung tentetba Taliban telok densema, alima linük Tir, Ato Kilonser, tongti yimsüsür, ketdangser, lokti tentet lenirtem aser alima ajunga nung nüburtemi Trump-i mamangtettsüsa US Tir election nung takok ngua, America’er 45 buba Tir akümtsü jenjang ajangzükba indang jembitsü tenzüka lir.
“Russia-i Trump lenisüba kübok par US den taoba mapang ama tanaben sentaktepshitsü mulunga lir,” ta Russia Tir, Vladimir Putin-i sangoktsü.
“Britain aser US na tsüngda tesendaktep tajung lir aser tarutsü anogotem nunga ozü linük ana tsüngda shishilembatsü, democracy aser mapatong balala aroki lungjemer takok ngua inyaktsü alizüng lir,” ta Britain Ato Kilonser, Theresa May-ia metetdaktsü.
“Democracy, nübur nem temeten agütsüba, ozüng kübok inyakba aser nüburtem tebendang kecha meli benshiba densema, Germany aser America na temandaktsü jenti nung tangatetba kasa lir. Trump-i US Tir tasenba akümtsü jenjang ajangzükba atema pela lemsatepba den ozü linük anati maneni aroki lungjema amalitepa alitsü nangzükshir,” ta Germany Chancellor, Angela Merkel-ia metetdakja liasü.
“Trump lenisüba kübok par US-i Afghanistan nung yutsüba US mitkar ajunga anitetadoktsüla aser taoba lenirtemi inyakba ama, tamakok angur mitkar lenirtem nem konang nüngsang magütsütsüla,” ta Taliban telokia par sangdong ka ajanga metetdaktsü.