Trump International Hotel nung mi adok

New York City, March 4 (Agencies) : Hokolbarnü New York Yimti kübok Columbus Circle nung aliba Trump International Hotel & Tower nung apartment ka teyanglutu ka nungi mi adok, ta osangbenertemi metetdaktsü.
Iba mi lendong ya New York mapang, anepdang 4:12 ako meta atalok.
1 Central Park West nung ki 52 tashi atongtepa asüba 47 buba nung iba miji adok, ta osangkakettem ajanga metetdaktsü.
Ki asürtem mapa inyakba mapang kol amshidang item kol rongnungji ka mapa junga meinyaki küma mi jenshiba nungi iba mi lendongji adok, ta ketdangsertemi osangbenertem dang ashi.
Khen nung mi tera ulua akümba ajanga iba kidang alir tesadang ka ki toktsüdaktsü, ajisüaka iba miji 5:20 ako nungbo remsepatok, ta osangbenertemi ashi.
Ki arongba takdang tekalen aliba takdang kabo mokozü agi asüngba agi mopung aitdaktsütsü asoshi kosaa liasü.
Lendong nung nisung kabo mokozü saketba agi timtema mozü kidangi anir ao.
Apartment 166 aliba ki ya 1996 küm asüba lir aser iba ki nung hotel-style service, health club, pool, sauna aser steam room tem den ano tanga nüngdakbatem dena lir, ta Trump International Realty-i ashi.