Trump Match ozüngi PBL nem temelenshi bener arutsütsü: Saina

New Delhi, December 21 (Agencies): ‘Trump Match’ ta ajaba badminton ozüng tasen amshiba ajanga Premier Badminton League (PBL) asayamong nem temelenshi tajung bener arutsütsü ta India’er tetsür badminton asayar mongin, Saina Nehwal-i metetdaktsüogo.
Trump Match ozüng ya tie nung densemba asaya 5 rong nungi asaya mashika shimteta iba asayaji ‘Trump Match’ ta züngshitsü temeten asayar telok nem agütsüba ozüng tasen ka lir.
Iba Trump Match kokra, takok anguba teloki bonus point 1 angutsü saka kasa asaya nung tamakok ngura, iba telok indang point 1 agi tejemba akümtsü.
Denmark tsür, Christinna Pedersen; India nunger B Sai Praneeth; China nunger Cai Yun; Indonesia nunger Hendra Gunawan aser Thailand nunger Bodin Issara nunger densemba Saina’er Awadhe Warriors teloki sangküm asayatsü ayongba PBL asayamong takok angutsü alizüng tulu yua lir.
“Alima nung asayar tajungtemi PBL asayamong nung shilem agitsü terenemshiba tulu agitsü tenzüka lir saka iba asayamong takok marokbo ozü teloki agizüktsü alizüng yua lir,” ta tetsür World No.2, Saina-i metetdaktsü.
“Tan asensüa latetba Trump Match ozüng amshishia amshira, telok balalai takok angutsü maongka tajung angutsü,” ta lai shisem.
Sangküm January ita 2 nü nungi tenzüka asayatsü ayongba PBL asayamong nung Delhi Acers, Hyderabad Hunters, Bengaluru Top Guns, Chennai Smashers, Mumbai Rockets aser Awadhe Warriors teloktemi shilem agitsü renema lir.
Iba asayamong tenzükba anogo nung Warriors telok o Rockets telok na mezüngbuba asaya Mumbai nung asayatsü lemzüka lir.