Trump nem tenlartemi sen meyipa meshir

Washington, October 9 (Agencies) : Republican party nungi US Tir menden atema toktepsang, Donald Trump-i 2005 küm tetsür maksütsü o tamajung jembiba menüngokba ka Hokolbarnü temai adoka metetba sülen nübuyim atema tenlartem mepelai kümogo.
Trump atema tenla sarudener kati, yashi tashi nung sen tenlartemi call asüba shira meshimatsü, ta CBS osangbenertem dang ashi.
Iba o menüngokbaji Washington Post-i mezüng metetdaktsü aser iba sülen nüburtemi parnoki tenlaba sen meyipa meshitsü tenzük, ta pai ashi.
Sen tenlartemi, Trump-i onok ashioktsüogo aser onoki meranga inyakba amajok kümdaktsüogo, ta ashi. Ano karibo Trump atema inyaker Indiana Angh, Mike Pence  den ajurutepner ta ashiba, paisa metetdaktsü.
Republican telok nungi tangartemi tesüiba mapang pa “Access Hollywood” nung Trump-i jembiba otem angashia kanga jashitep. Trump-i pa shi nung medemba tsütsü ajak dang temaba jenjang nung lir, ta asüngküm o jembiba nungji, pai, “Ni tetsür miim oset nung ajepa arua amtettsü. Na kodang nüngtugu nisung ka kümdir nai inyaknüba ajak inyaktettsü,” ta shia lir.
North Dakota Senate GOP conference nung mendenbuba John Thune dena Party nung lenir aikati, Trump dang Tir menden atema toktepba nungi atsünga ta shiogo.
Pa kinungtsü Melania Trump-i kinungboi magizüktettsü aser maksütsü o jembiba atema nüburtem dang taitok meshiogo.
House Speaker Paul Ryan-i, “2005 küm pai jembiba o angashia jashia bilemer,” ta ashi.
Ano Republican National Committee mendenbuba Reince Priebus-ia, “Tetsür shinga anema iba yimya nung ibala mesükba o mejembitsüla,” ta ashi.
Trump-i tang mapang ya pa dangi call aruba kata magizüki jenshir aser pai, “Ni iba tetoktepba nungi kodanga manentsü. Ni kü pusemertem teimla mesamadaktsütsü,” ta Honibar nikongdang tweet asü.
Deobarnü Hillary Clinton den o toktepba sülen Trump-i Texas sema tenla bendenba sentong ka akatsü lemteta lir.