Trump o Clinton nati Israel pusema nungitsü nangzüker

New York, September 26 (Agencies): US Tir menden atema candidate ama tokteper anapronglai par mezüngbuba Tir menden abentsü o lemtep sentong agiba jakdang Israel Ato Kilonser, Benjamin Netanyahu den yashi, Deobar nü mapang balala nung ajurutepa Israelpusema nungitsü nangzükogo.

“Israel linük tali tashi itshia alitsü aser par linük kümzüka ayutsü maparen nung pusema nungitsü renema lir. Ano, Israel aser Palestine na tsüngda adokba lushi den sentakba mangatettep ken o tongpang raraba mesüra United Nations (UN) aser iba amala alima tentettemi memeini par linük ana tsüngda ‘two-state’ tebentetbaren takok ngua agidaktsütsü atema bendanga agüja inyaktsü nangzüker,” ta Democrat yimtenren telok nungi Tir candidate, Hillary Clinton-i metetdaktsü.

Ano, Netanyahu-i kanga sashia anem aka, par US densema, alima tashi abenba linüktemi Iran linük den agiba nuclear tezüngzüktep mapa küma inyaktsütsü renemba olen ka Clinton-i lemsatepa liasü.

 “Jerusalem yimti ajunga Israel yimtiba ta züngoktsü nangzüker,” ta shia, Republican yimtenren telok nungi Tir candidate, Donald Trump-ia Israel-i arrtsü kümzüka ayutsü nükjidong nung Israel lushi ajunga lungbanga atsü atsütsü onük Netanyahu den benokba osang angazükogo.