Trump-Russia tesendaktep indang kuli Comey-i agütsü

Washington, June 08 (Agencies): Taoba mapang Federal Bureau of Investigation (FBI) nung director inyaka alisang, James Comey-i Senate Intelligence Committee matsüngdang US tir, Donald Trump aser Russia tsüngta tesendaktep aliba kuli agütsüogo.
Comey-i pa kuli ya anepdang 10:00 ako nungi agütsü tenzük aser US tir, Donald Trump-i May 9 nung pa mapa nungi anentsüba sülen pai jembiba nüburtemi tanü mezüng angashiogo.
2016 nung US tir atema election agiba mapang Russia teyari ajanga Trump-i Hillary Clinton madak takok angu, ta temolung melemtetba ken o FBI ajanga bushisüngdangba mapang FBI director, Comey ya Trump-i mapa nungi anentsü.
Comey-i tezüluba nung pa indang kuli agütsüba tem Senate panel ajanga Bodhbarnü saya aser Comey-i tebang agi langzütsü anünga lir.
Russia nunger indang bushisüngdangba ajanga ni tir mapa sadema meinyakteter, ta Trump-i Comey dang ashi, ta taoba FBI director-i zülua lir.
January 27 nung Trump aser Comey-na kisüng chiyongba sentong ka nung Trump-i Comey dang akhum tsübu nüngdaker, ta shia liasü, ta iba tezüluba kuli nung shia lir.
Tena tanaben February 14-nü Oval Office nung ajurutep dang Trump-i Comey dang taoba mapang national security adviser, Michael Flynn inyakyim bushisüngdangba anenadoktsüla, ta ashiba osang tejangja iba tezüluba nung shia lir.