Trump sabang nungi anien

New York, November 06 (Agencies) : Honibar aonung nübuyim sentong tagidak nung mejangjatetba nisung kati sabangi atutsü merangba ajanga Secret Service agent temi Donald Trump sabang nungi anien.
Sabang tejaklen alir, tenük kuli angur aikati iba nisung jagi prangpong bena liasü ta osangbenertem dang ashi, ajisüaka Secret Service temibo pa ket nung prangpong mapu.
Trump o tejembidak nung memetetba nisung sabangi atutsü merangba ngua Secret Service agent tem aika aoksaa sabangi tua Trump sabang nungi anien.
Iba tesem nung sendena aliba nüburtem kanga makmakshimaka jenshitep dang osangbenertemi nokdanga aliba tesemleni ao aser parnok kanga artepa liasü.
Osangbenertemi menden nung nokdaker tatalokbatem noksa tangoka alidang telok rongnung kati, “Ya tangokang! Teyazü jembirtem!” ta arongloktsü.
Iba sentong nung adenertem taotsü kishileni tsübuseta asem yonga aoba mapang Trump den yaritepertemi parnok den anidaker osangbenertem dang gari anenba tesemleni oang ta ozüng agütsü.
Osangbenertemi lokti tiyongtsüi ai. Prangpong teperi bena aliba police ketdangsertemi sabang tesülen nungi nisung ka puer oyaa liasü. Iba tatalokba dak sendakba nung police ketdangsertemi osangbenertem dang kecha melangzü.
Candidate ba joko sabangi matutsü ta bilema Trump den jajaba osangbener telokji mezüngbo gari anenba tesemleni ao. Ajisüaka minute tenet lir külen Trump-i “Tsüngremi USA Moajang” ta ashiba ola angashia nüburtem aser osangbenertem ajak convention hall-i tanaben meyipa ai aser Trump sabangi tanaben atu.
“Iba mapa ya temela asütsü ta shingaia mashi,” ta Trump-i ashi aser pai Secret Service tem dang pelaba metetdaktsü. Iba sülen pai tanaben anünga aliba o jembitsü tenzük.
Iba nübuyim sentong temer külen sangdong ka ajanga ozüng amshirtem dang pelaba lemsatep dang Trump-i, “Tanü nisung meyirjang aikati temulungtetba tajung agi iba sentong nung ni nungita adenba atema kanga pelar. Asenok shingaia menokdangtettsü – asenok senteper America ano tajungba kümdaktsütsü!” ta ashi.
Nübuyimba sentong nung Secret Service temi Republican party nungi Tir menden atema toktepsang, Trump kümzükbaji tan ya mezüng lir.
March ita Ohio nung nisung ka sabangi atutsü merangba agi Secret Service temi Trump lungbanga nokdanga liasü. Iba nisungji arishi küm 22 tain, Thomas Dimassimo liasü aser pa Trump matong tsüngda nokdanger pua anir orr merenshi. Trump-i iba nisungji ISIS den sendaktepa aliba nisung ka lir ta ashi saka mongintemi yamaji masü ta aitsüogo.