Trump temulung lemtetba lenir tajung lir: Abe

New York, November 18 (Agencies): US Tir tasenba akümtsü temeten ngua alisang, Donald Trump temulung lemtetba lenir tajung ka aliba olen ka Japan Ato Kilonser, Shinzo Abe-i yashi, Brehostibar nü metetdaktsüogo.
Trump-i election agiba jakdang par nüboyimtsü sentongtem nung par linük ana tsüngda tesendaktep mejungi akümtsüsa sangoktsüba olen kar jangjashitsü nükjidong nung Abe-i Trump den US kübok New York yimti nung tsüngdong ajurutepa senden ka amenba sülen pai Trump dak temulung alemba olenji sangoksü.
“Trump den tsüngdong ajurutepa senden amenba sülen ozü linük anati kati ka dak temulung lemteta, maneni tesendaktep junga yutettsü nükla nguogo,” ta New York kübok Manhattan nung tentetba Trump Tower nung Trump den minute 90 shi agia senden amenba sülen Abe-i ashi.
Ajisüaka, tenati kechi onüktemsa benoka jembi iba den sentakba osang tejangjabo Abe-i memetetdaktsü.
“Japan lenisang, Abe den ajuruteptsü maoangka anguba aser pa den temba ayimtsüsa tia ajuruba atema kanga pelar,” ta Trump-ia tesülen metetdaktsü.
Abe-i tan Trump den ajurutepba sülen pa alima lenir ajak rong nung Trump den tsüngdong ajuruteper mezüngbuba lenir kümogo.
Trump-i par election nüboyimtsü sentong balala nung Japan-i nuclear tongpang osettsüset bena arutsü merangba, Japan-i mitkar metsütsü senotsü taoba mapang nungi timba magütsüra, US-i par mitkartem Japan nungi anitetadoktsü amokmerenba aser US-i ayonger alima linük 12 rong nung agitsü renemba tetsükdaktsü kecha meli shishilembatsü Trans-Pacific Partnership (TTP) tezüngzüktep agitsü mapatong anemba osangtem sangoktsüba sülen par linük ana tsüngda taoba mapang amabo sendaktepa melitettsü akok ta Japan lenirtemi tebilemtsü akatsü tenzüka liasü.
“Temulung lemtep malibo linük ana tsüngda tesendaktep tajung ayutsüji tamakoktsü. Ajisüaka, ni Trump den tsüngdong ajurutepba sülen ozü tebilemtsü ajak agienogo,” ta Abe-i nenshia ashi.