Tsarü yimdak osangtajung arur küm noklang jungogo

Mokokchung, Aami/June 14 (TYO): Sangtam lima Tsarü yimdaki Khrista yimsü arur küm noklang ka ajungba sentong tulu ka ayongzüka mungogo. Iba sentong nung USBLA Executive Secretary Rev. C. Lima-i anir Sangtamer ordained ministers den MLA Müthingnyüba Sangtam, district administration aser nüburtem aika dena liasü, ta osang ka ajanga metetdaktsü.
Rev. C. Lima Executive Secretary-i “Jesus the light of the community” onük nung ajemdaker Tsüngrem osang abendang, teintet Khristan ka ama temelenshi bener arur rogo asütsü aser maneni kishikina nüburtem asoshi tesangwa agütsür asütsü asoshi tayongzükba agütsü.
Khrista yimsü bener arur mezüngpur parnok pungu-i par nübur nem tesangwa bener arutsüba tamaitsü item semchirtemi candle pungu tsükloka tetushi agüja liasü.
Tsarü yimdak mezüng osangtajung sangoktsür Aonokpu tsür Pangeryangla’er semchir Rev. Dr. Takatemjen-ia mapang tatsüka agia jembidang, asenoki koba tashi shilem agia lir ta meyipa reprangshiba den “küm nung masü mapa nung” (live in deeds not in years) alitsü asoshi tayongzükba agütsü.
Sentong nung Wb. Thripongse Head Barrick Tsarü, Wb. T. Lima Pastor Chuchuyimlang Baptist Arogo, Rev. Dr. Yanger (Convener Planning Committee) parnoki salem osang den tepela o lemsatepa liasü. Chumpongse Sangtam Principal, OTC Yangli–ia sentep ka nung “Jesus the light of the Family” onük nung ajemdaker Tsüngrem osang bener aru.