TSC inyakyim bushisüngdangtsü asoshi Meghalaya legislator-i akhanger

Shillong, March 22 (Agencies): Meghalaya nung kaketreju aika nung tajemtsü tzü maliba ajanga Total Sanitation Campaign (TSC) inyakyim bushisüngdang asütsü asoshi Meghalaya legislator, Dikkanchi D Shira-i tanü akhangba ola agütsüogo.
“TSC inyakyim bushisüngdang asütsü aser aibelena lira tapet temerenshi agütsütsü asoshi ni minister dang akhanger,” ta Mahendraganj indang MLA-i Assembly nung ashi.
“TSC temzüng nung aliba ama kaketreju ajunga nung metsü meshiba tesem yanglutsü aser tzü agütsütsü. Iba sülen kaketreju ajunga nung tajemtsü tzü agütsütsü,” ta PHE Minister in-charge, Prestone Tynsong ajanga ashi.
“TSC sentong nung lower primary aser upper primary indang sorkar aser sorkar masüba teloki lapoka aliba kaket rejutem ajunga ayimjemer,” ta Tysong-isa shisem.
“Iba sentong kübok teburtem asoshi metsü meshiba tesem 13,501 aser tetsürtem asoshia metsü meshiba tesem 14,867 yanglutsüogo. Iba kasa sentong kübok metsü meshiba tesem 2000 yanglushiba mapa inyakogo aser 175 bo junga lir,” ta paisa shisem.
“Iba sentong ya 2004-05 nung tenzük aser iba mapang metsü meshiba ki ka shia sen 20,000 agütsü. Saka 2014 küm nungi tenzüka sen 40,000 agütsür,” ta Minister-isa ashi.