Tseminyu ADC-i quarantine center nung maparen asadangshi

Tseminyu, Monupii/May 21, 2020 (TYO): Tseminyu Sub-Division nung quarantine centres/kisüjensütem ulushitsütsü lemtetba dak sendakba nung, ADC Nokchasashi Kichu, SDO (C) Tsutsowe aser EAC Tsogin Rozy Sangtam nati anir yimtsüngtem nungi council tem densema Tseminyu Sub-Div indang District Administration-i maparentem reprangshimdar.
Item quarantine centre nung, tanga state nungi shilangertem yipden dena takdang balala, metsü meshiba tesem aser teka shidoktsü asoshi water tap balala yanglutsütsü ternemba lir.
Brehostibarnü (21.05.2020) ADC Nokchasashi-i GHSS building Old Tseminyu Town kübok Covid-19 quarantine centre nung teinyakdak aliba maparentem reprangshima asadanga liasü aser NYKS indang volunteer aser Tseminyu Town indang GB temi iba maparen takok ngua inyaka aoba ajitetta pai pelaba metetdaktsü.
Item centre semdangba mapang 5 Sector AR indang Major Dahir ‘E’ company, COB Tseminyu 40 AR-a dena liasü.
Tanga state nungi pei tasoli bushia arurtem agizüktsü renema alitsü asoshi Tseminyu indang yimtsüngtem dang ADC Tseminyu-isa metetdaktsüogo.