Tseminyu nung Ngada Mini Hornbill Festival tembangogo

November 28, 2019 nü RSA ground Tseminyu Old Town nung 2019 Ngada Mini Hornbill festival tatembangbuba sentong nung Advisor, R. Khing-i jembiba noksa nung angur.

Tseminyu, November 28 (TYO): November 27-28, 2019 anogotem nung RSA ground Tseminyu Old Town nung Rengma nungeri 2019 Ngada Mini Hornbill festival mongogo; iba sentong nung Phensuny aser Tseminyu yim na, Tsogin Cultural Troupe, Kithagha group aser Kandi Group Tseminyu New Town-i sobaliba ken atenba den yar-tsüngsang ajanga shilem agia liasü, ta ketadangsertem osang ka ajanga metetdaktsü.
Iba sentong nung Advisor, R. Khing-i Ngada benjung salem osang aben. Paisa Rengma nunger tetsü-tebou nungertemi alu-achiba nungi tenzüka küm piyong aluyimba mapang tashi nung külemmong ama benjung 54 prongla monga aruba indang metetdaktsü.
Paisa Rengma nunger aianu aser adianutem dang asenok Khristan kümaka iba tetezü angatettsüla, ta ajungshi.
Ngada benjung nung tejaoker, Angami Public Organisation President, Dr. Kepelhusie Terhuja-ia Tenyimia units ajaki Rengma nunger den Ngada benjung salem osang abenaba metetdaktsü.
Rengma nunger nütsüng ishika dang, ajisüaka Rengma nunger lushibo kanga tulu, ta shia Terhuja-i Rengma nunger dang kidanger tribe ajak den maneni tesendaktep tajung ayutsü ayongzük.
Benjung tembangba sentong ya Yhunchulo Khing leniba nung agi, Benjamin Lorin-i lokti pelaa agizükba o jembi aser benjung Organising Committee Chairman aser Tseminyu ADC, Nokchasashi Kichu-i tepela anküp o jembia liasü.
Tetenzük sarasadem aser tetem sarasademji Executive Secretary CRBC, Haiwala Apon aser Tseminyu Town Baptist Church Pastor, Athinglo Khing nati agia liasü.