Tseminyu nung Poshan Mela lapoktsüogo

Tseminyu, Luroi/August 30, 2019 (TYO): Meimchir temang dak sendakba ajak anema alitsü atema lenla ajuanga ayimjemba scheme, koba ‘Poshan Abhiyaan’ ta nüngja agütsür Ato Kilonser Modi-i tenzükja liasü, iba scheme dak sendakba Poshan Mela Open ka August 30, 2019 Hokolbarnü Town Hall Tseminyu nung tetushi tesemdanger Tseminyu ADC, Nokchasashi Kichu-i lapokja liasü, ta APRO sangdong ka ajanga metetdaktsü.
Poshan Mela Open sentong ya Department of Social Welfare den line Departments longjemer ayongzüka liasü. Iba sentong nung Anganwadi Workers aser Self Help Groups balalai alu nung züsentetba aonsotsütem sayua liasü.
Sentong nung ADC Nokchasashi-i jembiba mapang pai, aluyimer talisa aonsotsü aser süngjanglijang lu ayimertem dang pelaba metedaktsü aser parnok dang iba luyimba maparen meneni takok ngua yimya balala bendenloksema inyaktsü asoshi tajungshiba agütsü.
Iba sülen, SHG-i lapokba aonsotsü stall balala ADC-i semdanga liasü.
Maneni, kasa sentong nung CDPO Kohima (Tribal), James Ezung-i Poshan Abhiyaan-IEC & Advocacy nung jembi aser tanurtem nem tetsü mama yongdaktsüba den külemi temang nung teyari agütsüba chiyongtsütem anepalua agütsütsüla ta ashi, kong CDPO-isa malnutrition tapu ana ajanga temang nung timtem adokdaktsür, ta metetdakja liasü.
Anungji, tanur temang anepalutsü atema nutrition tim agütsüba yimyatem angatettsüla ta sentong nung adenertem dang CDPO-i shia liasü.