Tseminyu nung tetsür tashiyim agi raksatsür ka apu

Dimapur, September 2 (TYO) : Nsunyu yimer Chenga Tep’er jabaso Phachulo Tep (26 yrs)-i Tseminyu nung Naga tsür ka alu nung lia tashiyim agi raksatsütsü merang ta August 29, 2015 nü Tesophenyu Group Women Union (TGWU) tiri Tseminyu P.S nung ken o ka benok.
August 21, 2015 nü tetsürlaji alu inyaker kidangi meyipa aotsü atema jen shibangya lia tebursangji tesülen nungi aru aser la tapubang nung sot. Tebursangji la dak sotba ajanga la marakzüteti aküm ajisüaka lai tebursangi tangatetba tamajung nung la dak kongshiba meteta lai teyari meshia asaten, ta Sub-Divisional Police Officer & PRO Kohima-i sangdong ka nung metetdaktsü.
Iba mapang tetsürla kinungbo tetsü anameta aliba alu ka nung mapa inyaka lia olaji angashi aser arsanga aru. Idangji tebursangji jena ao. Ibaji ser külen, tetsürla o kinungbo tetsü na alu toktsür kidangi meyipa aodang, tebursang jagi tena sülen anidaka aru aser tena dang anenang ta ashi, ta police sangdong nungsa shia lir.
Tena manenra pai injang agi akahtsü ta amokmeren aser pai pa indang air gun nungi injang kar kahdok saka tena dak mekahshi. Tatsü lir külen, tebursangji tena tonga aru aser tetsürla dak prangpong agi tuiter la tepsettsü ta amokmeren. Idangji tantsüla jagi ola tashi agi adoka asaten aser iba jagi tebursangji jena o, ta Kohima Police-isa ashi.
August 29, 2015 nü ken o benokba sülen police-i Phachulo Tep apu aser pai police tsüngdang aibelenba nangzükogo. Iba dak sendakba nung Tseminyu P.S nung keno ka benokogo, ta Kohima Police-i sangdong nungsa shia lir.