Tsg nung ToT-tem atema CFR training kadaki

Tuensang D.C Alemjongshii Tuensang nung CFR training tenzüktsür külen shisalen sayur aser shilem agirtem külemi tangokba noksa nung angur. Mokokchung, November 9, 2016
Tuensang D.C Alemjongshii Tuensang nung CFR training tenzüktsür külen shisalen sayur aser shilem agirtem külemi tangokba noksa nung angur. Mokokchung, November 9, 2016

Tuensang, Nov 9 (TYO): Community First Responder (CFR) ta sür alima lendong tapu balala ajuruba mapang mezüng langzüba onük dak sentakba nung Training of Trainers-tem atema shisatokden sentong ka Bodbarnü Tuensang Deputy Commissioner Alemjongshi ajanga tenzüktsüogo.
Iba sentong nung Tuensang district kübok head quarter densema sub-division tenet (7) nungi adenshia shilem agia dendaki. Iba shisatokden sentong ya Nagaland State Disaster Management Authority-i nungita Home Guards & Civil Defense, Health & Family Welfare, State Disaster Response Force (SDRF) den külem sür District Disaster Management Authority (Tuensang)-i ayongzükba lir.
Tanü iba training tenzükja Tuensang D.C Alemjongshii mapang tatsüka agia jembidang, alima nung lendong tapu balala lir aser item rongnung alima yimya lendong (natural disaster) dak alaka ano nisungi yangluba lendonga lir, ta ashi.
Tesayuri aibelenra putu aika tesama ajurutsü, anungji, maibelentsü asoshi temulung agüja aser nendaka angazüker pei yim aser pei sub-division-i meyipa or nüburtem dang sayutsü asoshi, paisa tayongzükba ka agütsü.
District Disaster Management Officer (Tuensang), T. Wangshi Jamiri training agiba nükjidong tatsüka lemsatepdang, alima lendong tapu balala ajuruba mapang mezüng langzüba maparen ya yimdak yimtsüng tonga lua akokba tashi nübur ajak nem angazükdaktsütsü atema lir, ta ashi. Nenok (ToT) ajanga dang CFR nükjidongji tongtettsü alinung, ajaki kanga junga angazükdaktsünür, ta paisa shisem.
Naga nungerji teyarinü kin ka lir, anungji, iba ama kin ka nem ano training agütsüra, tang dang nungi kümzükba maparenji tajungba inyaktettsü imlar, ta paisa ashi.
Anogo pungnü nungji alima lendong tapu balala atalokba mapang pei taküm kümzükba den tangar yariba tasatem, tongtibangsa; bandage alepbayim, tangu mesashiteti süja or alidang shia arudaktsüba yimya (CPR), tangu sashiba lenmang nembanger alidang anepaluyim (FBAO), tekolak/terongtong yirudang anepaluyim, tetsüng-teben yirudang alenbayim, lendong mapang jembishinü, sangzü alenba tasa aser taküm kümzükba tasa balala sayutsü, ta DDMO-isa metetdaktsü.

You must be logged in to post a comment Login