Tsipras-i aniba Syriza yimtenren teloki Greece election kokogo

Athens, September 21 (Agencies): Greece nung tentetba left-wing yimtenren telok, Syriza lenisang, Alexis Tsipras-i teloktep sorkar tasen tenteter par Greece linük tejakleni anitsü tenangzükba olen ka yashi Deobar nü metetdaktsüogo.
Tsipras-i yimsüsütsü menden benoker ita 7 buba nung, taoba August ita Ato Kilonser menden toktsüba ajanga par linüki election agitsü mapang atongba jakdang anojungi election agitsüsa aküm aser iba election nung Tsipras-i aniba Syriza teloki jenjang tajungba ngua Tsipras-i Greece Ato Kilonser menden maneni abentsü jenjang tajung angu.
Taküm 2015 küm tenzüker tan agi tasembenbuba election sentong nung Syriza teloki vote noklang nung shilem 35.5 ngua menden 300 densemba parliament indang menden 145 tashi ajangzük.
Par telok sülen anidaka, New Democracy teloki vote shilem 28.3 ngua parliament menden 75 ajangzük aser Golden Dawn telokia vote shilem 7 ngua parliament menden 18 ajangzüka lir.
Par Syriza teloki külemi lokteper taoba sorkar tentetba yimtenren telok, Panos Kammenos-i aniba Independent Greeks den tanaben loktepshir Greece sorkar tasenba tentettsü sentong renemba osang ka Tsipras-i metetdaktsüogo.
Independent Greeks teloki vote shilem 3.6 ngua parliament menden 10 alangzükba osanga bushiteta lir.
“Ozü Syriza telok nem takok bener arutsüba atema Greece nübur ajunga dang pelaba metetdaktsür. Greece nüburtemi ozü telok dak temulung alemba ama par nükjidong ajangzüktsütsü asoshi Greece sorkar tasenbai nungdakba maparen inyaktsü nangzüker,” ta arishi küm 41 tain Tsipras-i sangoktsü.
“Nüburtemi temulung lema shimba ama ni aniba Greece sorkar tasenbai kümzük 4-ji tembanga yimsü asütsü nangzüker. Nüburi aginüba ama asen Greece jenjang taoba mapang nungi tajungba kümdakja tejakleni anitsü nangzüker,” ta pai shisem.
Tsipras-i aniba sorkar tasenbai 2016 state budget renemtsü, pension system tajungba küma yanglushitsü aser sarusaji timba küma ajungkettsü maparen rongdaka inyaktsüsa akümtsü kechiyong yamaji inyakba ajanga dang par linük indang rongsenren jenjang tajungba küma par linük nem sen aputsüba eurozone nem tekaraba mapang nung sentsü sen meyiptsütettsü.
Ano külen, eurogroup ta ajaba eurozone finance minister-tem densemba telok lenisang, Jeroen Dijsselbloem-ia Tsipras den election nung takok anguba atema pelaba olen ka lemsatepogo.