Tsitsipas-i Dominic Thiem koka ATP Finals title benogo

London, Yimpoksüi/November 18 (Agencies): Stefanos Tsitsipas-i Deobarnü ATP Finals final asaya nung Dominic Thiem koka iba asayamung koktetogo.
Arishi küm 21 tain Greek nunger asayar yagi 6-7 (6/8), 6-2, 7-6 (7/4) agi asaya koka Lleyton Hewitt sülen iba asayamung akoker asayar tanobusang kümogo.
Tsitsipas-i taküm title asem koktetogo aser taoba küm Milan nung Next Gen ATP Finals akokba sülen tang iba asyamung koktetogo.
Pai hopta tepeyong kanga junga asaya aruogo aser semifinal nung Roger Federer koka final asoshi jenjang ngutet.
“2019 champion ama bilemtettsü ya jangrademtsüka lir. Iba ya kü nükjidong atalokba ka lir.
“Asaya nung mapang kar nungbo ni nervous süa liasü saka ni iba ya amadok aser tie-break nung kanga junga asayatet, koba kanga toktepa asayaogo.
‘Kü dak matem tashi raratsü asoshi tanüla ka aliba aser meranga asayatsü merangba ajanga ni tatem nung takok ngutetogo,” ta Tsitsipas-i ashi.
Ajisüaka iba tamakok ya Thiem asoshi tezüdakgtsüka liasü, shiba taküm asayamung pongu kokogo aser item rongnung Indian Wells Masters densema lir. Paisa taküm densema French Open final küm ana atonga tongtetogo.
Asayar tasentemi Federer, Novak Djokovic aser Rafael Nadal atsüngtoktsü asoshi meranga asayaba mapang ka nung, Tsitsipas lanur asayartem den kanga toktepa asayaogo. Parnok asem yagi tebur tennis asaya küm 15 tashi amokbanger asaya arudar.
World number four Daniil Medvedev-i taküm Masters title ana kokogo aser US Open final tonga asayaogo. Kasa mapang nung Alexander Zverev-i taoba küm pai koker aliba asayamung defend süogo.
Tsitsipas, shibai 2019 “Big Three” nung asayar asemprongla kokogo pai temaba jenjang tongtettsü ta temulung lema season tasenbai aitsü.