TSUK 22buba lokti senden kaogo

Kohima, August 26 (TYO): Honibarnü LCS Building Kohima nung Thenyizumi Students’ Union Kohima Kohima (TSUK) 22buba lokti senden aser Fresher’s day mongogo, aser iba sentong nung o jembirji, Home department under secretary, Veswusayi Kezo liasü.
Kaketshirtem den jembidang Veswusayi Kezo-i, takok aser junga inyaktetbaji kasa dang lir, aser ibaji meranga inyakba agi ajangzükteter, ta metetdaktsü.
Paisa, shisaliokji alizüktettsü saka shisatsübo pei sasa dang ajangzüktettsü, ta ashi.
Kezo-i kaketshirtem dang, nenoki ajangzüktetba atema nüma atangtsüla, saka iba süngjangji lokti nema chidaktsütsüla, ta ashi.
Paisa, asenoki yashi indang melenshitsü makok saka tanü asenoki inyakba ajanga tarutsü yanglushitettsü, ta ashi.
Nüburtemi pei oshi aser sobaliba amadokdar, ta shia pai, “Thenyizumi atema nüma atangtsüla, kechiyong ibaji nenok tera lir. Asenok tera nung ajemdaka lir aser ibaji ajanga asenok tera koma yanga lir, ibaji tangartemi angur,” ta ashi.
Paisa, iba yim putiotsü ji ano junga mezülu mesüra research junga magi, anungji lanurtemi iba teraji junga bushitsüla, ta ayongzük.
Kasa sentong nung o tatsüka jembidang Thenyizumi VDB Secretary, Thepukrayi Nienu-i, kaketshirtemi mark junga angutsü atema dang nükjidong yur meinyaktsüla, saka pei sasa taküm litettsü atema lenmang bushitettsüla, ta ashi.
Paisa kaketshirtem dang lokti ajungtsü atema taküm libaliro junga alitsü ajungshi.
Kasa sentong nung HSLC & HSSLC examination 2017 nung takok angurtem nema tetushi agütsü.
2017-18 küm atema TSUK executive züngsemtem sangdong, aser kasa mapang atema Tir tasenbaji Veduto Theyo aser tatong Tirji Nukedu Dawhuo asütsü.