Tsükchir nungi kümzükba tenüngsang

“Kibubai Dawid pa tsükchirtem ket aser Saul ket nungi kümzük, pai KlBUBA dang iba ken ya aten, KlBUBA kü lung kü mitsa, aser kü kümzükba lir.” 2 Sam. 22.1-2
Anogo shia asenok tanela tongpang nung dang alir. Tongpang nung tsüngchir süa noktaktetbaji na masü saka Tsüngrem ain tashi ajanga lir. Anungji Tsüngrem nem tenüngsang talubosa agütsütsü nüngdaker.
Kodang Dawid tsükchirtem ket nungi aser Saul ket nungi kümzük Dawidi Tsüngrem nem tenüngsang tulu agütsü. Kodang Dawidi timtem, lendong aser tatidang ajak nung arema Kibuba dang ata-a ali, pa pang nungi ken tasen ka inoktsü aser iba tenüngsang ken tasen kaji ya liasü, “Pai ni tetsübubtsü kangla lishitsüng nungi anitet aser lungma nung nokdakdaktsü, aser Pai kü mera ajak kümzüka ayu.”
Tsüngremi Dawid kümzükba asoshi pai koda tenüngsang lemsatep yamaji asenokia Pa tenüngsanga lemsateptsü asoshi Ibri 13: 15-16 nung yamai ashir, “Ajangla asenoki pa ajanga maneni Tsüngrem dang tenüngsang tenla oda pa tenüng nangzükba tebangmechi tejang tenladi. Tajung inyaktsü tesendokma, aser na kechi aka ibaji tangar den lemsatepangma, kechiyong ibala tenlatem agi Tsüngrem mulung achir.”
Sarasadem : Kibuba Nai ni kümzükba asoshi tenüngsang agütsüba nung tangar tali temoatsüba südakjang. Amen