Tsükchirtem mittsü atema mitkartemi satellite 13 amshidar: ISRO

New Delhi, June 26 (Agencies): Hokolbarnü “Eye in the sky” Cartosat-2E satellite nung surveillance dena khakettsüba sülen mitkar mapa atema amshiba satellite 13 kümogo, ta Hombarnü Indian Space Research Organisation (ISRO) osang ka ajanga metetdaktsü.
Item satellites ya arrtsü tesemtem surveillance aser mapping atema amshir, aser talisa ali aser tzüyim naprong nung tsükchirtem mita reprangtsü asoshi amshir.
ISRO osang ajangasa, “Item remote-sensing satellites timbaka alima orbit anasa lir. Item satellites ji sun-synchronous polar orbit (Alima ‘surface’ nungi kilometer 200-1,200 tekalen) nung ayuba ajanga alima tajungba ‘scan’ süteter. Ajisüaka item satellites rongnung karbo geo orbit nung yuogo,” ta metetdaktsü.
Tawa khakettsüba seret 712 touzük Cartosat-2 series spacecraft ya advanced remote sensing satellite ka lir.
“Mitkartemi amshiba satellites 13 rongnung Cartosat 1 aser 2 series den Risat-1 aser Risat-2 densema lir,” ta kasa osang ajanga metetdaktsü.
Indian Navy-ia raraba rong, tzü telung nung senzüba rong, tayimtsü tongtepratep atema Gsat-7 amshir.
Tsükchirtem satellites raksatsütsü atema India-i anti-satellite weapon (ASAT) amshitsü koka lir, ta ISRO-isa ashi.
US, Russia aser China nungeria item satellites amshir.
Space Applications Centre Director, Tapan Misra-i, “ISRO-i International telatetbatem sülen anidaker, koba ajanga space agency züngsemtemi anüng tawa nung mitkar tashi amshitsü memelar,” ta ashi.