Tsüklai (Feb) 27 nü election atema shingaia tenüng magütsü

Kohima, Tsüklai (February) 01 (TYO): Tsüklai February 27, 2017 nü 13buba Nagaland Legislative Assembly election nung tokteptsü atema tenüng agütsütsü asoshi Aenjeti 31 nungi Tsüklai 7 anogo tashi mapang agüja lir, ajisüaka tanü agi anogo ananübuba tashi nunga shingaia tenüng agüja mali.
Tanü Additional CEO Nagaland, N Moa Aier-i, tesüiba anogo ananü tsüngda yimtenren party balala nungi mesüra independent candidate kati danga election nung tokteptsü atema tenüng agüja mali, ta metetdaktsü.
Yimtenren party temi nomination papers form meshidar asü? ta asüngdangba langzüdang Additional CEO, Moa-i, election nung tokteptsü tebilemba alir candidate temi peipei tesem nung Returning Officer aser District Election Officer’s chambers nungi form meshidar, iba den külemi internet service ajanga-a form ji download sütettsü, ta metetdaktsü.
Aenjeti 29, 2018 nü Core Committee of Nagaland Tribal Hohos & Civil Organisations-i ayongba senden nung state nung National aser Regional yimtenren party balalai election nung shilem magitsü atema Joint Declaration ka agüja liasü. Iba mapang nungji NPCC aser NDPP dena party balalai, party kari danga election nung shilem agira parnokia shilem agitsü, ta jembia lir.
Tanü NPCC Media Cell sangdong ka ajanga, “NPF aser BJP-i anir yimtenren party ajaki election nung shilem agitsü atema renemdar, anungji kobi melii Congress party-ia Election Manifesto 2018 sayatsü, kong ajak atema tarutsü tia tajung lateta lir,” ta metetdaktsü.