Tsümar kati Nagatsür ka dak mejungi benshi, Lanurtemi dokan osettem rongdoktsü

August 25, 2016 nü New NST Kohima nung lanurtemi tejashi nung dokan osettem gari lenmang nung agizüka rongdoktsüba noksa nung angur. (Kohima, August 25).

Kohima, August 25 (TYO): Yasüng Bodbar aonung Kohima town nung tsümar dokan kibur kati Angami tsür ka dak tim mesüi benshiba osang angashia tanü Brehostibar nü lanurtem adenshia iba tsümarsang dokan nungi dokan osettem agizüka rongdoktsüogo.
Osang ajanga angazükba agi, tetsürlaji yasüng kidangi meyipa aoba mapang ka Kohima town nung Razhu point nungi tsümar kati la sülen anidak aser laji Phoolbari ta ajaba tesem atongdang tsümarsang jagi la soter la dak mejungi benshitsü tenzük. Idangji lai ola adoka asaba angashia yangji alirtemi paji pur police nem agütsü. Iba tsümarsangji dokan amener nisung ka tenüng agi Shahin Ahmed liasü.
Iba osangji angashia tanü tetsürlar yimer lanurtemi tsümarsang meyong dokan ana lapoker yangji aliba dokan osettem agizüka rongdoktsüogo.
Mezüng oset agizüka rongdoktsüba dokanji UT Kohima anasa UBI ATM Booth kima liasü aser kaji NST tasenba nung liasü. Iba lendong atalokba sülen lanurtemi tsümar dokantem shibangdaktsüyonga aoba ajanga tanü 11:45 ako shi nung Kohima town nung dokan ajak shibanga liasü.
Iba lendong atalokba sülen Angami Youth Organisation (AYO) aser Angami Students’ Union (ASU) purtemi shilem agia tensa tiaji tamajungba moudaktsüi sot saka tsübuba agi dokan aika melapok.
Dokan osettem rongdoktsüba osang angashia Fire Services purtem miji inseptsü ao saka osettemjibo mekümzüktet.
Iba tatalokba osang angashia AYO-i tsümar kati Nagatsür mezüngmeshiba mapaji aitsüogo.
Tanü lanurtemi inyakbaji tsümarsang mapa dak alang inyakogo aser tsümarsanger kibongji yaktasa Kohima toktsür aotsüla ta AYO-i ozüng agütsüogo. Parnokisa tsümarsang pua alibaji agizüktsü merangra majungtsü ta metetdaktsü.