Tsümar züiner, asenok ajemer

Yaküm küm lockdown mapang Nagaland nungi tsümartem aika pei lima bushia aoba agi Nagaland nung tsümartem nütsüng ajema akümtsü aser parnoki inyaka aliba mapatem ajak asenok lisopurtemi inyaktsü ta teimla tasen ka temulung nung aita bilema liasü, ajisüaka tang ita ya tom ka atong tashi nung tsümartem to yaküm meyipa aoertem dang nungibo tangang teimba arua asen lima nung mapa ajak parnoki inyak tenzükdagi. Atangji, tanga district-tem nungbo yaküm meyipa aoertem to tanaben meyipa marui alitsüa akok, saka Dimapur nungbo ano tangsa telongsoba küma odagi. Aji oda, Covid-9 wara aruba tajangzük kaji asen lima telonglenbo hopta nung anogo ka tsümartem atuagi kechisarina yoker aluba shishilembaba yimya to anenogo, anungji tangbo tesem aika nung tsümartemi masü saka asen nisungi dang aonsutsü aser jangotsü ayokba angur. Aji oda, joko hopta nung khen asen limai atua ayoktsü atema tsümartem nem bazaar lapoktsüba sentong tobo teti asoshi anenadoktsüla aser asenok ajangzüktsü atemabo asenokang tzümaleni lur aseni züsentetba chiyongtsü aser yanglutetba osettem parnok dang ayoktsüla. Asenoki asen chirnurem lia aotsü atema tarutsü anogotem indang kodang bilemdangdir, tang amaisa ao nungbo 2100 nungbo Nagaland ya tsümar lima kümadoktsü. Tangbo asenoki Nagaland Legislative Assembly nung tatar menden 60 nungi menden ka parnok tsümartema tatar kümnüra election nung tokteptsü asoshi lapoka agütsür, ajisüaka aji jet ta meyiper, 2100 tashi nungbo Naga nunger lisopurtem asoshiang Nagaland Legislative assembly nung reservation nüngdaktsü, kechiyong reservation-ji melira tatar menden ajunga nung tsümartem dang adoktsü. Ibaji tang Nagaland nung Naga nunger nütsüng ajemba aser tsümar nütsüng züinba tensa tia ya ajanga asadangtetter. Naga nungerbo kinungtsü kaka dang agir aser tanur-a memesütettsü tsübuba agi ka mesüra ana dang asotsü meranger. Ano, tanü putu nung balaka tia majung kaji, Naga nunger kibong aika nung tanur agi memoar, iba jagi Naga nunger nütsüng kanga ajema kümdagi. Aji oda, kibong ka nung tanur ka dang sora nisung ana senteper ka dang yanglur, iba jagi Naga nunger nütsüng tesadang ka (50%) ajemadoker aser kibong ka nung nisung anati tanur ka meyanglutetra, iba jagibo Naga nunger nütsüng kenyongi mali küma tesamaleni aotsü tenzüker. Ano, külen Nagaland nung arua alir tsümartem kibalembuba aser nütsüng renlokba ya reprangdangra, tebur karibo tetsür pezü pongo agir aser parnok shia jagi tanur pezü pongo asor, tetezü asenok Naga nunger kibong nung tanur kata masodang, tsümar kibong ka nungbo tanur ter metsü asor. Item kibongtemji asen lima shishilembadak chipo – aonpo, ango-an aser entsü, ngashi aser akong, secondhand süoshi, electronic osettem, aben süoshi aser tsüngsem ayokertem lir. Parnokji asen lu aser asen mapa inyakertem. Aji oda, asen ki mesüzükdang parnok kibong nung tantsüla aser tambusangbo joko mapa inyaktsüsa nübo junger mapa nung asem tenzüker. Iba amaji tsümar kibong tasen ka, kinüngtsü o kinüngbo na, nisung ana Nagaland nung lia tenzükba to küm metsü nungbo ishinba agi nisung pongo trok ka kümadoker. Iba amaji Nagaland nung tsümar kibong lakh ka dak tema nung züindagi. Item nung jagi taruba küm 50 tsüngda nisung kwika renlokdir sükdangdi aser shisabolua bilemdi. Iba amaji asen lima nung asen chirnur aser semchirsemnurtem bendanger kübok malitsüsa tanü asenoki, akhi mapang British nungertemi ILP amshitsü tenzüka yutsüba ama, ozüng agi bendangertem Nagaland nung aruagi senso küma mezüindaktsütsüsa tenokdangba ka alitsüla. Ibaji atema tanüa ILP ya kanga akanga amshitsü nüngdaker. Iba nüngdak metetba agi Manipur nunga ILP amshi tenzükogo aser Meghalaya nunga sashia kangdagi. Iba denji ano tang Nagaland government-i inyaktsü asoshi bilema aliba “Register of Indigenous Inhabitants of Nagaland (RIIN)” sentong ya yaktasa mapa küma inyak tenzüktsüla. Nagaland nungbo Dimapur nung dena ILP amshitsü asoshi ozüngbo lateta lir, saka shingaia hau ta mali aser RIIN ya mapa küma amshitsü latetra, nisung aika Nagaland nung sensobo mesütettsüsa akümtsü, iba jagi aikati anema nokdaker aser iba tashiji Nagaland government nung alirtemi metizüktetter. Ibayongji, tatar senden nung benoka jembir ozüng akümtsü asoshi Banuo Z Jamiri aniba luden ka nem teinyakbo mapa kanga bolua inyakdaktsüogo, saka tang tashi tagitsü küma latettsü asoshi tatar senden nung onük kümer mebenoktetter. Tetezü, 2100 küm matongdangyongi tanüa asenok ya asen mulungba nung masü saka tangari mulungba nungang mulung anitesüngzükba alitsü tenzükogo. Ibaji tarutsü nung, Naga nunger lisopurtem atema lendong tulu aketba tamaitsü (sign) tamajung ka Nagaland jara nung zülua sayur asütsü.