Tsüngluruwa Nagaland tatar senden tenzükogo

Kohima, July 12 (TYO) : Tanü Mongolbar nü nungi tenzüka anogo asem amentsü asoshi Nagaland tatar senden tenzükogo. Ibai tsüngluruwa mapang amener asüba agi tsüngluruwa tatar senden (monsoon session) ta ajar.
Tatar senden nung Speaker Chotisuh Sazo-i tamasa taoba Nagaland tatar senden nung züngsem (MLA) asür R.Lisen bilemteta pa taküm otsü ashi aser tatartemi minute ana ola madoki asür nem akümtsübu agütsü. Asür R.Lisen ya Dimapur nung lia taoba May ita asem nü alima nungi pilaadok.
Tang tatar senden nung züngsem (MLA) 60 prongla government nung dena lir, anungji opposition menden nung züngsem kata mali. Shitakba agibo tatar senden nung, opposition purtemi balaka, nübortem ajangzüktsü asoshi government nung alirtem dang department balala nung inyakba maparen  indang ken o asüngdanga langzüdaktsür, saka tan tatar senden nungbo shingaia kecha masüngdangba agi senden nung tejembitsü maka melamelaa tembang.
Iba senden nung Commissioner & Secretary of NLA, N Benjamin Newmai-i Governor P B Acharya-i agizüka telemtetba agütsüba ken o itemi agütsü : The Nagaland Appropriation (No. 1) , iba yagi March 31, 2016 tashi mapa inyakba atema Nagaland State Consolidated Fund nungi sen crore 850.64 agütsütsü melar. The Nagaland Appropriation (No. 2) Bill, 2016 : Iba yagi March 31, 2017 tashi mapa inyaktsü atema Nagaland State Consolidated Fund nungi sen crore 13658.74 agütsütsü melar.
Nagaland angh-isa “The Nagaland Prohibition of Gambling and Promotion and Regulation of Online Games of Skill 2015,” agizüka telemtetba agütsü.
Tatar senden nungsa Nagaland Lokayukta Bill 2015 yanglutsü atema shimba Assembly Select Committee nung mendenbuba aser züngsemtem nem mapang ano ita trok apuloktsütsü latet. Iba Committee nung mendenbubaji Parliamentary Secretary Levi Rengma aser züngsemtemji  Paliamentary Secretaries R. Tohanba, C. Apok Jamir, Pukhayi aser Advisor to Chief Minister Dr. T M Lotha nungertem lir.
Ano, Parliamentary Secretary for Higher and Technical Education, Deo Nukhu-i St. Joseph Catholic University (Nagaland) Bill, 2016 benok aser iba ken  o nung July 14 nü o lemtep akatsü.
Parliamentary Affairs minister, Kiyanilie Peseyie-ia “The Nagaland Salaries, Allowances and Other Facilities of The Chief Minister, Other Ministers, Speaker, Leader of Opposition, Deputy Speaker, Parliamentary Secretaries and Other Members of The Nagaland Legislative Assembly and Pension for Ex-Members (Amendment) Bill 2016,” benok. Iba ken o ya ozüng küma latetra, iba jagi Nagaland nung taoba aser tang teinyakdak yimsüsürtem ita sen aser tanga teyaritem teimba angutsü.
Tang ya Nagaland nung taoba aser tang teinyakdak tatar yimsüsürtem nisung 288 nem ita sen agütsür. Item rongnung tang temendak parnok 60 den, taoba MLA-tem 141 aser family pensioner 87 lir. Ita nung parnok nem agütsüba sen ajak agi Rs.90,94,500 adoker aser tang benoka aliba ken o ya agizük nungbo ita nung parnok asoshi sen 1,57,30,000 endoktsü.
Iba telemtetbaji kodang Nagaland ang-i agizükdir, iba anogo nung jagi iba ita sen tasenbaji angutsü.
Chief Minister T R Zeliang-ia 2011-12 küm department 13 nung sen talila Rs 54.94 crore endokba agizüktsü asoshi ken o ka benok.
Tatar senden inyakyim aser yimsü agi Bodbar nü senden mamener, anungji July 13 nü senden malitsü. Tanü benokba ken o ajakji July 14 nü dang jembia lemtettsü.