Tsüngrem aitsü !

Kolkata yimti nung azüklen kilometer ana dak tali asütsüsa yangluba sen crore 164 jenjang apu (flyover) ka teyangludak nung tan March 30 nü chirepa nisung 24 tashi nenseta südaktsüba den ano noklang junga yiruba lendong atalokbaji Tsüngremi inyakba mapa ka liasü ta iba mapa inyaker company ketdangseri ashiba o ji kangasa mebilemdangi jembiba tejashitsü o ka lir. Iba ama alima meimchirtemi jembiba oji Tsüngremiang komaka angaa alitsü ta süngmanga bilemer. Mapa aika nung nisungtemi morumorua rongsen arishidang ochimashi mapa inyaker aser item ochimashi mapa jagi aiben lendong tulu bener arutsür. Ajisüaka, nisungtemi pei dakbo tai mangur saka tangar dang aitsütsü meranger. Iba ama mesükba mapaji tang Kolkata nung apu chirepba lendong ajanga tali jangjar. Iba apu chirepli ano tasür aser teyirurtema ajakbo mangu aser magitet nembanga alidang, mapa inyaker company-i Tsüngrem aitsü aser West Bengal Chief minister, Mamata Banerjee-i taoba Left Front sorkar aitsü aser ano tanga yimten teloktemi state nung yimsü tesüdak Trinamool Congress telok aitsü. Aji oda, lendong atalokbaji kodaser atalok ta kuli bushia metongshitsü melen tamasayongi Tsüngrem dena aija telok kati ka aitsütepbajiang tezüdangtsü tuluba kümogo. Iba apu ya yangluba mapa tenzükba indang asüngdangtepa aodang angazükba agi, iba mapa inyaktsü asoshi 2009 küm Hyderabad nung amenoka aliba company ka tenüng agi IVRCL telok nem West Bengal state sorkari agütsü. Iba sülen, ano IVRCL teloki Kolkata nung aliba company ka tenüng agi Sandhyamani Projects nem ‘sub- contract’ agütsü. Ajisüaka, tang lendong ataloker bushisüngdanga aoba mapang putetba agi, IVRCL telok ya mapa junga meinyakba telok ka liasü aser ano parnoki parnok tenüng nung inyaktsü atema ‘sub-contract’ agütsüba telokjia iba ama mapa tulu kodanga meinyakdangba telok ka liasü. Ibayongji, kodaser iba ama teloktem nemji mapa tulu inyaktsü ‘contract’ agütsü ta aikati süngmanga bilemer. Aji oda, iba ama lendong atalokba indang Engineer-temi bushidanga aodang apu tangitba tongshi meshitak azüngba aser oset jenjang tezübaba apia amshiba puteta lir. Item kulitemji bushidanga aodang, mapa memetetyonga ‘sub-contract’ angutsüsa akümbaji sorkar nung minister aser MLA den kinunger aser kanga junga tesendaktep aliba ajanga angu südi ta puteta lir, kechiyong iba apu atemtsü sub contract angusangji tang West Bengal nung yimsü tesüdak Trinamool Congress nung lenir ka den kinunger aser pa kinungtsüji MLA lir. Iba ama mapa jagi kibong aika lendongi idaktsüogo. Atangji, item aibelenertemji mapang tetemsü nung tapet ozüng agi merenshitsü imlar saka parnok merenshiba agi tasürtemtobo shia marutsü aser teyirurtembo meyiru aser makoksa mekümtettsü. Joko, Kolkata nungbo kechi tataloktsü liasü atalokogo, saka Kolkata lendongji bilemdangdang Nagaland nunga memenui iba ama apu mesüra ki karbo chirepa lendong ataloktsüla amai bilemer. Asenok taliba kitembo yutsür, asenok mapa inyakdak office kitem contractortemi yangluba karbo mashimashi yanglua alitsüla amai bilemer. Item office ki chirep nungbo yangji mapa inyaka alirtem koma asütsü ta shisabolua bilemdi. Aji oda, asenok lima nung apu tema alibatema reprangdanga anepalu masür, anungji tashimait kümadoker. Dimapur nunga Kolkata nung amaji talang mesüaka, train jajaba lenmang azüklen apu (flyover) tatsütsü ana tema lir aser anepalu masüba ajanga apu anaprongla nung yin kateta adoka lir aser apu tezü anatsülen ali tua ki yangluteper. Iba amaji mereprangi toktsüra, ashiko item ama apujia mashi mapang nung chireptsüa akok. Iba ama tia atemaji ajaki shisabolua bilema asen lima nung kiojen, lenmang aser apu yangluba mapa ya yimsüsür aser tulurtem den metettepa aliba apia masü mesüra sübokrem aika agütsüba agi masü saka mapa metetter aser pei lima meimer nem dang inyakdaktsütsüla aser yanglua aliba apu aser kiojentem ajak jungjunga anepalua akangakanga aser topur jungjunga ayutsüla.