Tsüngrem akümtsüburtem

Tsüngremi ashiba ochi otem rongnung tongtibang kaji shirnoki Tsüngrem akümtsübur Paia parnokjiang akümtsübur. Asenok ya alima nung liaka Tsüngrem yimli nung alir, anungji shirnoki Tsüngrem meimer Pai tali meimtsü saka shirnoki Pa memeimer aser mezüngshir, Pai parnokji Pa yimli nung mezüngoktsü. Iba kasa oji asenoki 1 Samuel 2:30 nung yamai shia angutsü, “Shirnoki ni akümtsübur, nia parnok akümtsübutsü aser shirnoki ni mezüngmeshidir, nia parnok mezüngshitsü.” Anungji, Tsüngremi asen meimtsü-memeimtsü mesüra akümtsübutsü asü metsübutsü, ibaji asenok dak keta lir. Asenoki Tsüngrem tsüngdang koma lidir yamaji Paia asenok den alitsü. Eli ya küm aika Israel nunger madak putir liasü. Pai Tsüngremer ozüngtem jungjunga meteta liasü aser pa ama kati Tsüngrem tsüngdang koda meshiteta alitsüla, aji pai meteta liasü. Ajisüaka, pai Tsüngrem tsüngdang koma alitsü tim yamaji melitet. Pai Tsüngrem tsüngdang par kibong meshiteta meyutet aser Tsüngrem akümtsübutsü melen par jabasotemang aküm tetsübuba ama aküm. Akhidang, putirji kanga dang temeshi, Tsüngrem den jembirtem, anungji tashi tulu liasü. Putir jagi dang nübortem rongnung yimsü asü aser obendang, anungji parnokji Tsüngrem akümtsübua Pa tsüngdang meshiteta alitsübaji kanga nüngdak liasü. Ajisüaka, Eli’er kibong asoshi dang masü saka Israel nung ajak atema tia makatsü kaji, Eli’er jabaso anapronglai Tsüngrem aküm metsübu. Parnok temeshi ozüng süngden ayudak temeshi tenla kidang alir, saka parnoki memeshiba chiyongtsü achi aser nüktapangta benshi. Par jabasotemi temeshidak menenja temenen mapa inyakbatemji Eli putiri meteta dang liasü, saka pai parnok mesongtem aser mazüoktet saka parnok sünütsü südaktsü. Aji oda, Eli putiri par jabaso arüja azüoktsü melen, parnok nem temeshi ozüng süngden apudaktsür tongpangi odaktsü. Eli putir  jabaso anati temenen mapa inyakbaji ajaki meteta liasü, saka shingaia parnok anema ola madoktet, anungji metetsümonga Israel nunger taküm aika tsükchir ket nung sama. Ashiko, Eli putir aser par jabasotem jagi parnoki Tsüngrem akümmetsübuaka, parnok temeshi kidang alir aser temeshi süngden parnok ket nung aliba jagi Tsüngremi parnok taküm aser kibong kümzüktsü ta bilem südi. Ajisüka, tenla kidang aliba agi nisung ka temeshi makümer ta Tsüngremi Eli nem angatetdaktsü. Aji oda, ozüng süngden apur senzüba agi nisung ka temeshi akümtsü makok. Ibayongji, ozüng süngden apur tongpangi aor Eli putir’er jabaso ana tsükchirtemi tepset aser ozüng süngden dena rakzükdaktsü. Israel nunger asoshi ibaji tongpang makokba dang nungi maksü tuluba liasü. Iba osangji angashir Eli putir menden nungi tsüka tekong sükdanger asüba otsü asenoki 1 Samuel nung angur. Kibongbo temeshiba nung aküm saka tanurtem mazüoktet. Kibo meshitet saka takümbo memeshitet. Kidang Laishibabo lir teti ibaji yipten kolak nung yur mejanger, saka tazünga mazünger aser Tsüngrem o nung shia aliba amaia malir ta asüba asen kibongji akhidang Eli’er kibong mesüka lir. Eli’er kibong ya asenok ajak asoshi tansütsü kibong ka lir. Asenoki tenla kidangbo Tsüngrem tenüng asanger saka asenok mapa inyakdakbo Tsüngrem amadoker. Tangar tamanger tajungtem den medemdangbo asenoka tamanger tajung amai alir saka kodang asenok kija lidir asenok takümji tangar asoshi temetsüdaktsü long amai akümer. Tsüngrem nungi takok aginüa asenoki Pa nüng sanga tashi meshir saka takok anguba sülen asenoki asensasa angu amai bilemer. Tsüngremi iba ama temulungjang aser libaliruji maginür. Tsüngremi asenok nem moatsüba kimong, ki aser kibong ajakji temeshi lir, anungji asenoka temeshi lidaktsüner. Iba amaji ka melitetra, Tsüngremi asenok daka tangar ajak tan asütsüsa inyaktsü. Tsüngremi asenok akümtsübuner, aji koda maongka tulu. Ajisüaka, ibaji asenoki Pa akümtsübu nungang Paia asenok akümtsübutsü ta tanü iba Tsüngrem o yagi asenok dang nenshia ashir. Ibaji asenok asoshi ano taochi ola ka asütsü.