Tsüngrem anasa lir – T. Ken 145: 14-21

“Shirnoki Kibuba ajar parnok ajak dang pa anasa lir, atangji nisung shibai ajar ajak dang anasa lir” (t.18). Ibaji tenangzükba tulu masü no? Ibai tulu. Iba tenangzükba nung yur nai tanü mapa inyaktsü akok. Asenoki tali angatettsü merangdi.
Mezüngbuba, shirnok metsüdaker parnok anasa Tsüngrem lir. “Shirnok laor ajak Kibubai ajongmesor, aser mechioker alir ajak atsümesor” (t.14). Na metsüdaker alanga alitsü akok. Nai kechi inyaktsüla meinyaki alitsü akok. Na ne mapa nung metsüdaker, aser temulung makai shisabulua alitsü akok. Na temenen nung metsüdaker alitsü akok.
Tanabuba, Khuret abener anasa Tsüngrem lir. Shirnok tebilemtsü khuret agi kokroka neneta lir, parnoki Tsüngrem dang jara parnok anasa Tsüngrem lir.
Tasembuba, yaa alir anasa Tsüngrem lir. “Tenük ajaki ne madak ataa alir, aser mapang tetemsü nung nai parnok nem chiyongtsü agütsütsü” (t.15).
Tekong 16 Tsüngrem asoshi sarasadem langzütsü temela ta ashir. “Nai pei teka salar, aser taküm aliba shiai jangraba nai tiptemdaktsür”. Tsüngremi inyaktsü ajunga agi Pa teka salar tanü asenok nüngdaktem moatsütsü ataa alir. Tebilemtsüji aiben asenoki asen temulungjang melapoker aser Pa dang mayimtener.
Pezübuba, shirnoki Tsüngrem dang ajar parnok anasa Pa lir. Asenok iba tenangzükba tulu kar: “shirnoki pa tsübur parnoki jangraba pai ataloktsütsü; Pai ano parnoki ayimtenba angashitsü aser parnok kümzüktsü” (t.19).
Tatemsa shirnoki Tsüngrem meimer parnok anasa pa lir. “shirnoki Pa meimer Kibubai parnok ajak wazüka ayur; saka tamajunger ajak samatsütsü” (t.20). Yakobi sayuba anidakang “Tsüngrem anasai arung aser Pai nenok anasa arutsü” (Yakob 4:8).
Tsüngrem na nungi talangka masü. Nai mezüngbuba mera agitsü, pa dang ayimtentsü aser ashitsü, “Kibuba, ni na anasai aruner. Ni yangi lir,” ta ashitsü Tsüngremi ataa alir. Na metsüdaka lir asü? Na khuret bena lir asü? Mesüra nüngdak lir asü? Shirnoki Pa dang ajar parnok anasa pa alitsü pai nangzüka lir.