Tsüngrem asenok den lir

Tambur Yakob joko Yosef den malitsü kechiaser pa asütsü mapang tonga aru; saka pai jabaso dang shisa bulua temulung makai teli ta temulung alemtsü toktsü; kechiaser pai ashi, “Tsüngrem nenok den alitsü.” Kodang aseni meimtiba mesüra asen dang yarir tembar tajungtiba tasüba ajanga Tsüngremi kidangi jadir, Kibubai asenok nungi pilaa mao saka asenok den teti dena lir ta metetta asenok mulung tipatemtsüla.
Asenok sensaker aser temeimer meliaka, Tsüngrem asenok den dena lira asenok tamaren telok nung lir. Tsüngrem asenok den dena lira asenok tashi teperi kar, kechiaser Tsüngrem asoshi kecha tamakoktsü mali. Tsüngrem asenok den lira, asenok teti kümzüka lir, kechiaser Tsüngrem akhüm nung jajajrtem kecha agia yirutsütsü makok. Oh, asenok asoshi koda tepelatsü! Tsüngrem asenok den dang dena ali masü, saka Pa asenok den alitsü – kija dena, kibong dena, arogo nung. Yisu tenüngji Immanuel- Tsüngrem asenok den lir ta masü na? Tsüngrem asenok den atenba nung ibai tajungtiba masü na? Asenoki kümdanga tasü itdi aser pelashishia imladi. Asenok lenmang nung azükarutsü, ochibai akoktsü, kechiaser Kibuba den shirnok alir parnok den Pa adentsü.
Iba anogo tepiyong, iba O nung tamangertemi pelashishia liang. Ne tamang tendangang. Iba dang tuluba tepela mali.
Kibuba Tsüngrem Yisu ajanga Na onok den dena ali nung onoki matendener aser metsübur, kechiaser Ne tashikang akhüm kübok alir kechaia tsübudaktsütsü aser yirutsütsü makok. Ne ochi tenangzükba asoshi Ne tenüng asanger, Oba. Amen.