TSÜNGREM ASER TAMANGERTEM

~ K. Imliyanger Jamir, Erali bill, Dimapur.

Asentenshiji tanela temeshi dang asen menen jungkai adoka bilemtetdakjang ta mepishiba. Ni tanela nung takang asü ? Mesüra ni tanela nung tashi mait asü ? Mesüra ni nütsüngsüba nungi meyipa oadoker asü ta shisadangba mapang. Ni alima shi jangratem nung dang alir asü ? Mesüra kibuba Yisu Khrista tezülen yutsür, kü tashitemetet nung temulung lemer ali asü? Mesüra ni mamangertem den kasa alir asü? Parnok nungi adoka alir; itemji bilemtetba mapang. Asen tashi mait ajak tanela temeshi-i bilemtetdaktsübaji asentenshi mapang lir.
Yisu meimba dang nungi ni ni-ang tali meimer asü? Mesüra ozü kibongang tali meimer. Ni tangar nungi nüngsang bushir asü? Mesüra ni taremzük maliba tamanger ka asü; mesüra tenüng agi dang tamanger; item ajak jungkai adoka sayuba mapangji asentenshi ya lir.
Tamalen shiyonga arubatem nungji ka danga ne dak keta lira, mesüra nai hau ta shitetra asentenshiji na asoshi nüngdaker. Asenoki nangzükra Tsüngremi asenok dang tai adoktsü; aser pai asenok meshitettsütsü. Item dak alaka aseni aibelena jembiba aser inyakba atema tangar dang tatok meshiba, mesüra asenoki tangar dang tatok agütsüba mapangji asentenshi ya lir.
Yisu dang asen taküm meshitetdakjang ta sarasademba aser asen ajak pa nem bendanga agütsüba mapangji asentenshi. Tsüngrem dang pai kechisa shidir angatsü ta nangzükba mapang aser asenoki asen mulungjang lapoker tanela temeshi na kü mulungjangi aitang ta sarasademba mapangji asentenshi. Asentenshi ajanga asen taküm tanela nem anidaktsüba aser tanelai mulungba nung aliba agi shi mapatem matalokdaktsüi aliba tamangertemji asentenshi shidak agiba tamangertem lir. “Saka nenoki tanela agi jaj-ang aser shi tejangrabatemji tatalokdaktsüma.” (Gal 5:16)

ADIANU S.T.YAPANG LKR DANGI:

Temeimba, Joko Küm 3-4 shi Osang Kakettem nung nai lokti ajangzüktsü meji kechisa lemsatepa arudagi tazüngertem ajak tenüng nung molungnen O shitsür. Nai lokti menen tutetta züluba kar nungbo na met tonglokja amokmerenba züngshiogo, saka tazüngertemi parnok o bendangtsüogo. Ano tasü itshir marendaki ochi tangatetba nung lokti menen kakteta indoktsü züluba züngner Nüngjang petinu aikati tenük rangpoka reprangdar ni! Ochi meimer asen kin nungia pukümer lilanglangsa ako.
                                                                                       – IMPU Salangtem, Mkg