TSÜNGREM ASER TAMANGERTEM

K. Imliyanger Jamir, Erali bill, Dimapur.

Tekümtet, ibai Tsüngrem angati sempet. Asenok kümzüka lir, lir saka temenen nisung. Asenok meshitettsü nüngdaker. Tanela temeshi-i asenok meshitettsür. Asenok tamanger ajak alima temenen nungi pilaa alitsüla. Yisu Khrista taküm tenla ajanga asenok meshitettsüogo, saka asen taküm memeshiteti alir. Yisui dang asenok meshitettsür. Asenok Tsüngrem den litetsüsa temeshi taküm asütsüla. Saka asenok anosa temenen nung ali nung asenok meshitettsü nüngdaker. Tsüngremi asenok ajabaji temeshi taküm kaka alitsü atema aja. Yisui asenok ajabaji pa ama tabensa taküm ka asütsü ajar. Tabensa taküm ka asütsü asoshi tanela temeshii dang asenok meshitettsür. Asenok memeshitet tashi asenoki Tsüngrem angutsü makok. Asenok mulungsentsü merükmerüka ali nung dang asenoki Tsüngrem angutsü. Asenoki asen sasa temeshi mekümtet. Asenok meshitettsü asoshi tanela temeshi dang asen teyarir, kechiyong tanela temeshii dang asenok meshitettsütsü akok. Anungji tanela temeshii asen tanela dang kechi ashir ibaji inyaktsüla.
Tanela temeshii asen tanela den jembitsü atema asenoki asen menen toktsütsüla aser nangzüktsüla. Asen temang aser asen ajak Tsüngrem nem bendanga agütsütsüla. Asenoki laishiba teti azüngtsüla, aser tanela temeshi agi asen jakla taküm yimya azüokdaktsütsü melatsüla. Ano asenoki maneni Tsüngrem dang tashi tasen meshia sarasademtsüla. Tanela nem anidaktsütsü asoshi asenoki jangratsüla aser merangtsüla. Asenok ajak Tsüngrem taochi agi kümzük, kechiaser asenok ajak tanaben asoba taküm. Asenok ajak alima dangi tanaben meyipa moi aliba tamangertem lir.
Tanaben asoba takümji kinü tanür ka mesüker. Anungji asenok meshitetta alitsüla. Saka tamanger aika meshiteta malir. Kechiyong sotaka aliba temeneni parnok atsür aoer. Saka shirsa tanela agi sünga alir; parnoki metetsümonga aibelen masür. Ano asenoki angatetta alitsübaji yamai, asenok tanela agi sünga lidaktsütsü asoshi Tsüngremi ne dak kongshitsü akok; mesüra azüktsü akok. Anungji asen taküm nung timtem lendong arudang aseni shisadanga; Tsüngremi kechi inyakdaktsüner ta sarasadema pa dang asüngdangtsüla. Asenoki anogo shia temenen den rarar, iba raraji nai koktet nung dang na tanela temeshi agi asüngtsü. Anogo shia rarabaji peisasa azüokba, aser taremzük. Temenen nisung temenen lima nung alir ansünung asenok dak temenen mali ta meshiteter. Asenoki Tsüngrem den koma tesendaktep alir, yamaji asen aibelenji aseni puteter, aser asenok ajak Tsüngrem tsüngdang metemsüa ta apijemer. Anungji asenoki Tsüngrem anasai aoer aser pa den jajatsü meranger; aser asen tanela tashi itshidaktsür. Temenen denji tasünü tashi raratsüla shibai akoker pai rara tajungji raraogo.
Tanela temeshii nisung shia dak balala inyaker. Pei tamang, taremzük aser tazüokba yari pai asenok dak inyaker. “Nisung ajak den yimjung nung alitsü merangang, aser temeshiba koba makaibo kibubaji mengutettsü, iba temeshibaji arishia oang.” (Ibri 12:14)