Tsüngrem aser Tamangertem

~ K. Imliyanger Jamir,  Eralibill, Dimapur.

Tamangertem madak Tsüngrem tesayur mesüdaktsüba agi; parnoki Tsüngremer tesayubaji sempar aser Pa O tem magizüker. Anungji parnoki temenen den pelateper. Temenenji tamanger tesayur kümdaktsü nung parnoki ashioktsür aser tiyazü kuli asür. Tsüngremi sayuba magizükba agi tamangertemi azü tokshidaktsür, aser tebang temeli agi tiyazü jembir. Anungji tamanger rongnung ochi pukümer malir, aser temenen jateta adokdaktsür. Tai makaba zü tokshidaktsütsü ilunger. Kechiyong parnok tebilemba tamajung asü nung parnok madak teraksatsüba agi sünga alir. Parnok rongnung tesünep aser yimjung melii parnok temulungjang aser shisatsü tekirak agi sünga alir, anungji parnoki tesünepji memeteter. Parnoki tekümtet bushir saka aji parnok nungi talangka pilaa lir. Shirnok temenen agi atsür, aser shirnoki iba temenen sülen anidaker aiatai.
Shirnoki tamajung dang tajung aser tajung dang tamajung ta ajar, shirnoki temenenji temeshiba amai sabua benshir aser shirnoki tamajung sür nung tajung amai benshir parnoki Tsüngrem anema inyaker, iba jagi tamangertem molumi leni atsür aoer. Tamangertemi Tsüngrem metet; saka parnoki Tsüngrem ozüngtem mebenshir. Anungji parnok temulungjang nung tepela tsünep malir. “Nisung tsüngdang shitak mesükba lenmang ka lir, saka iba tatembangji tasüba lenmang.” (Api 16:25).
Yimsü nung keta asenba aser yimsü amangbaji nisung tsüngdang shitak mesükba lenmang amai, saka Tsüngrem dak mamangi yimsü dang amang nungbo iba tatembangji tasüba.
Tamanger aikati Tsüngremer tesayuba nung jaja nung parnok Tsüngremi kümzüker, aser parnok meratem tashi itdaktsür; aser lenmang tesangwa nung jajar. Parnok dang Tsüngremi koba shitak iba tesayubaji agütsür. “Lenmang ibai lir, iba nung jajang” (Is 30:21). Tamanger shiba Tsüngrem den jajar pa Tsüngremi nüka alitsü, aser tanela nung pa mesütsü aser tashi tasen angutsü, aser kodanga merosepba ayong ka ama, tzü nung medena aliba naro ka ama mazülai alitsü. Kechiyong Tsüngrem tanelai parnok dang sayu nung parnok shidak lenmang nungji jajar aser Pai mulungba dang inyaktsüji parnok dang sayur.
Tamanger aikati tanela temeshiji parnok tesayur kümdaktsü nung; Tsüngremi parnok tanela nem anidaktsü, aser tanela jagi parnok den jembir. Tanelai tasa ajak agütsür; ano tanelai rateta jembir. Tanela temeshii Tsüngrem ochiba indang kuli asür. Yisui ashi, “Saka teyarir, paji tanela temeshi, shiba Tebui Kü nüng nung yoktsü, Pai nenok dang ashiba ajak bilemtetdaktsütsü.” (Yohan 14:26). Tenüngsang Ken züluri yamai kuli asür, “Ne O kü tsüng asoshi milen, aser kü lenmang asoshi tesangwa lir.” (T.Ken 119-105).
Tsüngrem O temji asenoki benshira, aser asenok dak lira, tanela jagi asenok sayutsü, len tuyutsü aser asenok den jembitsü. “Idangji Kibuba tanela Gideon madak aru, aser Pai jangzü ka apu, aser Abiezra nunger Pa sülen aotsü külemi sentep.” (Oben 6:34).