Tsüngrem ashi angadaktsünüba

Tsüngremi asenok shiruru ama liasüba tia nungi nüji kümdaktsü. Asenok chiyongtsüa maka timtema liasü saka asenok tebok sünga chiyonga-jema alitsüsa pai asenok moatsü. Asenok sensaker liasü Pai takar kümdaktsü, asenok shiranga liasü pai aneptsü aser asenok tangar kübok alar jenjang nung okrongseta liasüba jenjang nungi Pai asenok anitet. Atangji, Pai    lendong timtem jenti nungi kümzüka asenok anitetba temeim aser taochi mapa ajak nungji Tsüngremer nükjidong aser Pai asenok nem inyakdaktsünüba sentongtem dena lir. Aji oda, item sentongtem meteta asenoki mapa küma inyaktsübaji kanga tongtibang asütsü. Israel nungertem Egypt lima nung alarsa aliba tia nungi Tsüngremi anitet. Aji oda, Tsüngremi parnok anitetba nükjidongji Pai par tsüraburtem dang nangzükba lima nung jangratema yimji-yimjung nung lidaktsütsü asoshi kija masü saka iba dang nung jagi tongtibangba Pa taginüba kar liasü. Anungji, Israel nunger Egypt lima toktsür ita asembuba nung Pai Israel nungertem dang Pai parnok anitetba nükjidong nenshia metetdaktsü. Tsüngremi Sinai arem nung Mosa dang ashi, ” Ni Ijip nunger dang kechi inyak aser kechi koda ni mongzü tashikang manung bener kümzüka nenok kü dangi anir aru, aji nenoki nguogo. Anungji, tang nenoki kü dang angadi süra aser kü tezüngzükba benshidi süra, ajangla kin ajak madak nenok ni asoshi kü rongsen balaka asütsü.” ( Anitet 19:4-5). Tetezü, Israel nunger alar tia nungi kümzükba nükjidongji Tsüngremi ashiba angadaktsütsü asoshi liasü. Egypt lima nung aliba mapang Israel nungertem nem Parnok Tsüngrem mekülemdaktsü. Tsüngremi iba tiaji meteta dang liasü, anungji iba ama alar tia nungi nüji kümer külen pelashishia aser sademsadema Pa dang meimtsü aser Pa külemtsü asoshi Tsüngremi Israel nungertem anitet. Aji oda, Tsüngremi Israel nunger kanga meimba agi, parnoki parnok anitetba nükjidong amadokalir ta ser ita asembuba nung Tsüngremi ano ken nenshia metetdaktsü südi. Israel nunger amaji, asenoka makamait aser timtem tia nung anitetbaji Tsüngrem taochi agi moatsüba mapatem lir. Ajisüaka, asenoki aiben asen mapa nung dang temulung agütsür. Iba jagi asenok kanga mazünger aser Tsüngrem külemtsüa amadoker. Tsüngremi asenok kümzükba, aneptsüba aser anitetbaji asenok alima nung timmedemi jangratema lidaktsütsü asoshi lir ta kisüng asenoki angatetba agi, asenoki Tsüngrem nem tenüngsang agütsütsübo amaa adoker. Asenokbo Tsüngremi kümzük aser Pai moatsü ser nung  asenoki Pa külemtsü mebilemteter. Tsüngremi koda asenok moatsür yamaji Pai asenok Pai ashi angaa lidaktsüner. Tsüngrem tashi angaba nung ali rongsen ajak keta lir. Pai ashir, ” ali ajak kü meyong lir.,” (Anitet : 19:5b). Atangji, asenok taküm nung timtem toushi aser shisabolu ajuruba mesüra Pai asenok moatsüba ajanga Tsüngremi asenok nem asenok tashi, temulung aser tanüla ajak agi Paji dang tsüngremtem madak Tsüngrem aser kiburtem madak Kibur ta angateta külemdaktsüner. Kodangsa, asenok mapa inyak junga kümdir, mesüra kodangsa asenok mapa inyaktsüsa maongka ngudir mesüra kodangsa asenok taküm aser kibong Tsüngremi anitetba aser moatsüba ajanga mapa inyakaa jangratema alitsü tenzükdir, Tsüngremi asenok nem maotsübaji asenok jangratema alitsü atema kija masü saka tongtibangbajibo Pai asenok Pa den teti longjema lidaktsünüba agi moatsü ta angatetdi. Tsüngremi asenok nem Pai ashi angadaktsünüba agi tashi manga dang merenshir aser tashi angadang moatsür. Aji oda, asenok taküm nung ajuruba tensa tia ajak nung Tsüngremi asenok Pa anasa,Pa den Pai ashi angaa lidaktsüner ta bilemtetdi. Israel nunger Egypt lima alar tia nungi aniteter ita asembuba nung nenshiba ama, tanü Tsüngremi asenok danga Pai asenok moatsüba, aneptsüba aser takok agütsüba nükjidong to tamadok ta nenshir.