Tsüngrem ashioktsütsüsa akümba

Aiben asenoki nisung dang masü saka Tsüngrema dena ashioktsür. Item rongnungji Yihuda Iskariot-a liasü. Tanü ama asenok küm shia Yisu Khrista asenok menen asoshi kangki nung asüba anogo bilemteta among dang, asenoki masü saka Yihuda Iskariot-iang Yisu ashioktsü ama bilemer. Iba jagi asenoki asenoksasa asen tai mangur. Ajisüaka, kodang asenoki Yihuda Iskariot-i Yisu ashioktsüba kuli bushidanga asenok taküm yimya, asenok jakla aser asenok mapa den medemdangdir, ashiko, asenokbo Yihuda Iskariot dang nungi tamajungba asütsüa akok. Atangji, Apijemtsü Shin 16: 4 nung shia aliba ama, nisung tamajungertema (temenenpurtem ta masü) tamajung anogo asoshi yanglu asünungji, tamasayongi Tsüngremer shin o ataloktsü asoshi, Yihuda Iskariot, nisung tamajungsang ya tamajung anogo aser mapa asoshi yangluba liasü ta asenoki angatetter. Aji oda, kodang asenoki Yihuda Iskariot-i Yisu ashioktsütsüsa akümba kuliji bushidangdir, kuli tulu ana kanga jangjaa angur. Item kuli anaji ka sen meimba aser ano tanga kuli kaji tenük meremba shisatsü liasü. Kodang asenoki Yohan tapu 12 nung shia aliba otsüji züngdangdir, idakji Yisu tasütsü anogo anasai aruba mapang ka, kenü pa Mari, Martha aser Lazar nunger kidang arua anenba mapang, Marii sen aika alangba teronem menemba totzü seret tesadang ka bener arua Yisu tetsüng nung mezütsüba ngua, Yihuda Iskariot-ibo iba totzüji senpak noklang asemyong yoker sensaker nem agütsü tajungba masütsü na (?) ta ashiba angur. Ajisüaka, pai iba o ji sensakertem meimba agi masü saka pai iba senji miimzüka pa agitsü bilema ashiba liasü, kechiyong pa auer liasü ta kasa tapu nung kanga jangjajangjaa shia angur. Iba shisatsüji tanü asenok dak aketba shisatsü kanga mesüka lir. Asenoki temeim mapa inyakba tenüng atemer ochimashi mapa kanga inyaker. Aji oda, Yihuda Iskariot amaji asenok rongnunga Yisu nem agütsütsüba tenlabo kodanga shitak magütsür saka teti sensakertem tenüng nung miimzüka agiba agi asenok takar akümer aser kibong mesüba kibongtem aika lir. Iba rongsenji Yihuda Iskariot-i Yisu ayokba sen semer den to kasa asütsü. Ibaji tetsübutsüka lir. Iba sen jagi asenoksasa asenok akoksatsüsa adoktsü. Yihuda Iskariot atema Yisu ayokba senji senmang küma mamshitet ama, asenok asoshia Tsüngrem ashioktsüa sensakertem tenüng nung miimzüka agiba sen agi kodanga azükaru masütsü. Yisu ashioktsüsasa Yihuda Iskariot dak aliba jakla tanabubaji tenükmeremba liasü. Aiben Yisu nütsüngtem rongnung shiba tuluba asütsü ta toktepa jembiba asenoki Laishiba nung angur. Aji oda, mapang kabo Yohan aser Yakob na tetsüibo Yisu tonga arur par jabaso ana pusema Yisui yimsü asüba government nung par jabaso ana nem tematiba portfolio agüjang ta Yisu dang apudaka mepishiba Mathi 20 nung shia angutsü.Tanga mapang nung jembibajibo yutsür, Yisu asütsü mapang tatsüka dang liaa dena, nütsüngtem rongnung shiba tuluba asütsü ta jembitepba asenoki Luke 22:24 nung angur.Joko Yisui alima nung yimsü asütsü anogo tonga arur ta parnoki bilem,anungji parnok rongnung Yisu kübok shiba tuluba ser yimsü asütsü ta jembitep dang, ashiko, jet ta Peter mesüra Yohan mesüra Yakob nungertem tuluba asütsü südi ta parnok ajaki bilemba dak alaka, kodanga lokti sen ketdangsüsang Yihuda Iskariot-jibo yimdangia maru.Idangji,Yihuda Iskariot dak tenük merem shisatsü ait aser pai Yisu den külemi par medemertem dena ashioktsütsü mulungtet.Kodang asenoki Yihuda Iskariot dak aketba tenükmeremba shisatsüji asen shisatsü den medemdangdir, asenoka aika mejenbutsü. Item ama rongsen meimba aser tenük meremba shisatsü agi asenok Tsüngrem nungi piladaktsür.Item temenen jaklatemji akoktsü asoshi, Yisui Pa taküm tenla agütsü, anungji tangbo Rom 8:37 (Ao Lashiba tetsüsa adokba nungbo mangur)nung shia aliba ama, asenok takokertem dang nungi taoba kümogo .Takoker danga taoba tetezü zübazübaa akokba masü.Atangji, sen meimba aser tenük meremba shisatsü akoktsübaji temela masü, saka Yisu tashi ajangabo akoktsü.