Tsüngrem asoshi ataba

Alima nung nisung kar ajurutsü mesüra langka ka ataloktsü atatsüba ya mapa tasak lir. Maru tashi  mesüra matalok tashi atatsüba atema taremzük alitsü kanga nüngdaker. Atatsüba ser nung tera agi matatet orr aliba ajanga tajurutsü pur tongtibang nisung majurutet takoksa anguba asenok taküm nunga aiben ataloka lir. Aji oda, tatem tashi ata nungbo angutsüba ser nung matatetba agi tera agi mangu mesüra majuru süitemdaktsüba asenok aika taküm nung ataloka alitsü. Kechi mapa südir süaka, asenoki tangsa tang inyakner, aginür, nguner mesüra tendangner. Idangji, asenok aikati Tsüngrem dang asüngdangtsü amadoker. Asenoki kanga aginüba, ngunüba aser inyakdangnüba agi aiben asenoki jangrabaji Tsüngremi mulungba amato bilemer.Idangji, asenoki matatet Tsüngremer sentong raksatsür aser asenoksasa asenok akoksar. Ajisüaka, asangur tajung, David-ibo Tsüngremer mapang maru tashi timtem toushi ajak arema ataba asenoki Samuel kaket nung angutsü. Tila tanur David san nüka alidang, Samuel putir ajanga Tsüngremi pa Israel nunger chuba asütsü shim. Idangji, Tsüngremi shimtetba Saul chuba Israel nunger madak yimsü tesüdak liasü. Ano, pa melen yimsü asütsüsa par jabaso asem tashi liasü. Iba ama mapang ka nung Tsüngremi Saul chuba melentsü David shimbaji nisunger tsütsübo tamamangtsü mapa ka liasü. Tsüngremi Samuel dang David chuba akümtsüba küm, ita aser anogo mashi, anungji David-ia pa kodang Israel madak chuba akümtsü meshitet. Iba ama mapang aser anogo ka atatsübaji nisung ka asoshi kanga tasak, saka David-ibo atatet. Ano külen, Saulibo Tsüngrem nem tarongba tenla agütsütsü asoshi Samuel ainker matatet agütsür aliba agi pa chuba yimli samaba otsü asenoki 1 Samuel 13 nung shia angur. Aji oda, David o Saul na tsüngda tepilaji kati mapang talangka Tsüngrem asohi ata saka katibo Tsüngrem asoshi anogo tenet nüa songtema matatet. Tsüngremi David dang Samuel putir ajanga pa chuba akümtsü asoshi mezüshia shimtetba sülenang David taküm nung tetsübu, tatenden aser shisabolu ajuru. Pa par kidanga melitet arem nung jenshia senzü. Aji oda, Israel nung chuba akümtsü mezüja shimteta alisang to Israel nunger lushi nung tetsübu agi melitet Palestine lima nungang alitsüsa aküm. Atangji, David ama alima nung Tsüngremer sentong matalok tashi ataba mapang nisung ka taküm nung timtem, lendong aser tetsübutsü tensa mapang ajuruba nisung tangarbo malitsü südi ta bilemer. Aji oda, Tsüngrem David den dena liasü aser Davidi pa den Tsüngrem adenbaji tejangja meteta liasü. Iba jagi, Tsüngremer mapang ka maru tashi aibelen mesüi aremzüka ataba yari, Tsüngremi David uludaktsü. Pa Israel madak chuba akümba dang masü saka pa dang nungi jakzükba nungiang Tsüngrem chir kümer alima meimchir temenen nungi kümzüktsü asoshi Yisu Khrista alimai aru. Aji oda, Tsüngremi temulung achiba Israel nung chubaji David liasü. Pa arem nung jenshia senzüdang mejemba kentem agi tanü tashi asenok mulung ajungshir aser tasü itdaktsür. Aji oda, asen taküm nunga Tsüngremer sentong ka ataloktsü ataba mapangjiang tang aser tarutsü atema kanga tongtibang mapang ka asütsüa akok. Tanü iba yimobilem azüngdang, na a Tsüngrem nungi angutsü langka ka imlaseta ataa lira, tasü aser tashi itshiang aser Isaia 40:31 züngang. Ibaji Tsüngremer tenangzükba lir. Atangji, taginüba ka angutsü atatsübaji tasak, saka asenoki aremzüka ataba dang nungi Tsüngremer sentongjisa tuluba. Mary o Martha nati tenu Lazar shirangba aneptsü asoshi Yisu Khrista ataba ama asenok aika tanü Kibuba asoshi ataa alitsüa akok. Pa arutsübasa, Pai aneptsütsü, Pai shia arudaktsütsü aser Pai agütsütsü. Aremzüka dang atadi. Laishibai ashir, Shirnoki Kibuba asoshi atar, Parnokbo tashi tasen angutsü aser kodanga melulatsü. Tsüngrem tenüng sangdi aser Kibuba anogo asoshi atadi.