Tsüngrem dak tamang ayutsüla : Velavoyi Keyho

Dimapur, March 23 (TYO): Transformation Crusade tenzüker anogo 9 nü buba nung tongti o jembirji Velavoyi Keyho liasü aser pai 2 Putipuyang 20:1-18 nungi tesentepertem ayongzük.
Pai ashiba agi, ajungbena dang Moabite aser Ammonite nunger den Meunite nunger ishika densema Jehoshaphat anema tongpang raratsü aru. Jehoshaphat-i Tsüngrem tsüngdang sarasadema tsükchir den raratsü shisatsü meshi. Tsüngremi pa sarasadem langzüa tsükchir den Tsüngremi rara.
Tanü asen Naga nunger rongnunga Jehoshaphat ama lendong timtem balala asen taküm nung ajurudang Tsüngrem dang shisatsü meshia Tsüngrem tsüngdangi arur marur? ta o jembiri tesentepertem ayongzük.
Aseni dang asen khurettem Tsüngrem dangi bener arura asen melena item timtem khuret anema Pai raratsü mulunga lir. Anungji asen meimchirtemi Pa tsüngdangi arua Pa den teti sendaktepa alitsü merangtsüla, ta Velavoyi Keyho-isa shisem.
“Nehimia 2:18 nung Nehimia-i Yirusalem jara raksar aliba yanglushitsü asoshi ayongzük. Iba mapang nisung aikati taitsüba agütsü, saka item ajakji Tsüngremi yaritsü ta tamang tulu yur pai mapa tenzük. Tanü asen lima teraksa tia nung aliba ya Nehimia ama Tsüngrem dak tamang tulu yur teraksa alibatem ya yanglushitsür karbo lir mali?” ta paisa asüngdang.
Tsüngrem tsüngdang rangloker kodang aseni ajakji inyakdir asen taküm kisüng nung temelenshi bener arutsüba dang masü loktiliba ajak nung aseni temelenshi tulu bener arutsütsü aser Laishiba nung shia aliba ama asen nisung shiai iba lima nung litetra alima nung teraksa ajakji melenshitsütsü takoktsü lenmang lir, ta Velavoyi-isa tesentepertem ajak ayongzüka liasü.
Taonung sentep nung nisung meyirjang aika adenshi aser tatem nung shiranger aser taneptsü aginüa alirtem tejakleni jaoka parnok asoshi balaka sarasadem agüja shirnok taneptsü angu parnoki telok dang kuli süa nisung aika tanela nung aser shi nung temoatsü aser taneptsü ngua agiogo.