Tsüngrem dang rasaba

Laishibai ashir, Yob ya Tsüngrem tsübuba aser temenen sempaba teindang nisung ka liasü. Atangji, iba jagi Tsüngremi pa nem jala jabaso teperi moatsüba dang masü saka anüdoklen alir ajak dang pa tuluba aser takarba asütsüsa moatsü südi. Ajisüaka, pa akaba ali rongsen aser chirnurtem ajak samar külenang, pa temang nung aneptsü makokba tashidak agi kangshitsüsa timtem takoksa tia ajuru. Nisung tsütsü bilemtsübo iba ama teindang nisung kati ajungben timtem aser takoksa tulu ajurutsübaji tim masü. Aji oda, Yob-a nisung dang asünungji paia kasaji bilem aser Tsüngrem dang pai maremtettsüsa timtemdaktsüba asoshi rasaa ayimten. ” Memeshipur dangi lendong aser temenen inyakba purtem nem teraksa agütsür masü no ?” ta Yob-i Tsüngrem dang asüngdangba asenoki Yob tapu 31:3 nung shia angur. Aji oda, Tsüngremi pa dang maochii reshikangshir amai bilem ( Yob 30:21). Iba ama nisung bang agi ashitsü makokba takoksa tulu ajurur ano temang nung reshikangshi ajuruba mapanga Yob-i pa temenen bilemdang saka mebilemtet, kechiaser pa temeshi nisung liasü. Asenokbo Yob den medemdangtsüla masü, kanga memeshiba nisung saka asenok dakbo timtem tilaka atalok nunga asenoki Tsüngrem dang rasar. Yob-ibo Tsüngrem dang kü dak tai ali asü maliar seret odangang ta ayongzükba Yob tapu 31 nungsa angur. Asenokia Tsüngrem dang yamaji shitettsü na (?) ta kanga tsübuseta bilemer. Iba amaji kodang Yob-i timtem marem Tsüngrem dang rasa aser pai angatetbatem ashi, Tsüngremi Yipru mopong nungi Yob dang langzü saka Tsüngrem telangzübatemjiang Yob asoshibo melangzütettsüsa tasüngdangbatem tulu liasü ta asenoki Yob 38 nung angur. Yob-i ajak metetter ama bilem saka Tsüngremer shisatsü aser tashiji nisung tashitemetet aser tangatetba agi atongla masü liasü. Atangji, Tsüngremi alima yangerdang asenok kong liasüar asenoki shitettsü asü ? Shibaibo alima tasazük metettsü ? Shibai ali nung tzüyim aser anünglen petinutem tarensena yutsüba angu ? Item tasüngdangtem jagi Yob ajemaludaktsü aser pai Tsüngremer tashi aser ain indang tali angatet. Idangjiang Yob-i langzü, ” kü shisa makaba o agi Tsüngrem tebilembatem miimbangtsü merangogo, ni mangateti jembiogo, tangang kü tenük agi Tsüngrem angur, aji asünung, ni küsasa ni aitsür aser auyi aser aut manung mena ni temulung meyiper,” ta Yob 42 nung temulung ashitsüka aser jangratemtsüka shia angur. Tetezü Yob ama teindang aser temeshi nisunga, alima nung alirji, taküm aser kibong nung tangar tsüngdang nümamedangtettsüsa takoksa aser timtem tulu ajurudang, Tsüngrem tsüngdang tai menar aser atsüngzüka aor. Ajisüaka, Yob dakbo tajung kaji, iba ama tia nunga pai Tsüngrem dang dang asüngdang. Yob tia indang bilemdang, aseni asübo iba ama timtem tia mapang, Tsüngrem nungi masü saka tangalen nungiang teyari angutsü imlaa bushila ta bilemer. Yob-i Tsüngrem tebilemba mangatet saka pai kodanga Tsüngrem nungi mepila. Pa asoshibo timtem takoksa tulu ajurubaji Tsüngremer sentong tali tejangba metettsüba mapang tajungtiba ka liasü. Atangji, asenokbo Yob ama teindang nisung masü, temenen nisung, mazüokba taküm saka Yob-i ajuruba timtem tetkajibo asenokibo majurutsüa akok. Ajisüaka, asen taküm aser kibong nung timtem aser takoksa tila ajurudanga asenoki teti Yob taküm aser tamang bilemtetdi. Asen taküm aser kibong nung kechisüa ataloker Tsüngremi repranga ataloker, Pai ajak meteta lir. Kechi tia nung lidir liaka Tsüngrem nungi mepilai sarasadem taküm aser kibong asütsübaji asenok tangatetba aser mapa asütsüla. Yob-i amangba Tsüngremji tanüa asen Tsüngrem lir. Iba Tsüngrem jagibo temenen aser tashidak madak takok tulu agütsür. Iba kasa Tsüngremi asenok taküm aser kibong anir ta amangdi.