Tsüngrem dang teyari meshitsüla :Gloria Tep

October 17, 2015: India’s Next Top Model nung 2nd runner-up jenjang nung takok angula, Gloria Tep den Toshinaro Imchen-i interview agia liasü.
Gloria Tep tebu ya Kerala nunger saka tetsübo Naga tsür lir.
July 19, 2015 nü mezüng süa TV nung sayuba India’s Next Top Model tetoktepba nung lai 2nd runner-up jenjang ngutet. Iba tetoktepba nung Lisa Haydon, Dabboo Ratnani, Anusha Dandekar aser Neeraj Gaba nungeri tendanga lisü.
Parnok shilem agir 13 rongnung tesüsa round asoshi Danielle Canute, Rushali Rai aser Gloria Tep Rengma nunger anüng aser Danielle-i mezüng jenjang nung takok angu.
Arishi küm 23 tain, Gloria ya Delhi nung lia Ambedkar University, Delhi nung psychology tezüngdak lir. Aji masüdang la Dimapur, Holy Cross School nung zünga liasü.
Nai koma ser Psychology azüngtsü mulungtet ta asüdangba mapang lai, “Ya ni shimtetba masü saka higher secondary lesson lem nung keta lir, aser nia iba subject kanga meima dok. Ni sobaliba balala tsürabur nungi jakzük aser ni tiyong nung koma ang ka masü kümadok. Ajisüaka Psychology zünga meteta aküm tashi nung item tebilemtsü samadok. Anungji iba subject yagi ni asoshi tajangzük kanga agütsüba ama tuluba zünglokshir ano tangara yaritsü ni mulungtet,” ta langzüa liasü.
Shibai na ajungmeso ta asüngdangba nung lai, Kü tsüraburtemi ni ajungmeso. Kibong nung kanga okronga alidanga tenati kü adianu kena nüngdakba ajunga peritsütsü merang. Tenati ozü kibong kanga junga acha ayanga, zep ta tepong langer ayur, ta ashi.
Facebook profile nung na Northeast tenüng nung tokteptsü ta shia lir, koma ser nai aji mulungtet ta asüngdangdang lai, ni Nagaland nung intet aser ibaji ajanga ni kü sasa Naga tsür amai bilemer. Naga nunger liba liro den dang aienba ajanga Nagaland ji temulungjang nungi mepilar. Nagaland nungi sentong balala nung tokteper aika mali aser ni ibaji ajanga state nung aliba lanurtem ajungmesotsü asoshi Nagaland tenüng nungi shilem agitsü mulungtet, ta langzüa liasü.
Professional model ka kümner asü, ta asüngdangdang lai, “Ni ibaji atema sentong lir saka tang ni Masters degree atema mapang nüngdakba den tebilemba tanga aika lir,” ta langzüdang laisa, model kümnertemi lenmang shitakba meteter ang iba lenmang nung ajemoktsüla. Iba den külemi ano tanga nunga na asoshi lenmang tesadem yapoka ayutsüla. Model kümer ajaki kaketshisatsüa metoktsütsüla. Ajak liaka Tsüngrem dang nungi teyari meshia inyakba ajanga takok angutsü, ta shisem.