Tsüngrem denbo ajak takoktsü

Asenok ajak ya Khristan asüba agi tamanger ta ajar asü mesüra Tsüngrem dak shitakba amangba agi tamanger ta ajar ta bilemdangtsübaji kanga tongtibang lir. Aji oda, yimsü agi Khristan süaka Tsüngrem dak mamangra asenok teti tetsübu nung alitsü. Akhi putu nung Tsüngrem dak chichia amangertem rongnung David-a ka liasü. Pa arishi kümbo kanga tanur saka tamang kanga tulu, anungji pai pa jakdang tebilemtsü arua anguba ajakji Tsüngrem denbo takoktsü ta amang. Aji oda, Israel nunger nokinketer walunirtem ajak Palestine nunger aso tulusang Goliath tsübuba agi temekok ajak anoka adendena aliba mapang ka, tila tanur David-ibo Goaliath-ji akoktsü ta pai bilem, kechiyong pai pa den Tsüngrem lir ta amanga liasü. Saul Chubai anir Israel nunger ajak asoshi Goliath-ji tetsübutsü nokinketer ka liasü. Pa ola angashiba kija agi parnokji tsübua adok. Tanüa Tsüngrem dak mamangba nisungtemi tebilemtsü arudang makoktsü amai dang bilemtsü aser tebilemtsü nungi ajentsüang merangtsü. Ajisüaka, Tsüngrem tashi nung tebilemtsütemji akoktsü ta amanga  anema nokdaktsü melen tebilemtsü nungi jenra tebilemtsü jagi asenok menepa adoktsü aser tebilemtsü nemji asenok kokdaktsütsü. David atemabo taküm nung tebilemtsü ajurubaji pa nok leptepdak liasü. Tebilemtsü ajanga dang pa nübortem matsüngdang nüngtugu aküm. Pa asoshi shimtettsüba lenmang ana dang liasü, pai Goliath mekokra pa asütsü aser Israel nunger ajak Palestine nunger kübok alitsü saka pai Goliath kokra pa taküm alitsü aser Palestine nung ajak Israel nunger kübok alitsü. Ana rongnungji pai Tsüngrem tenüng nung takokbaji dang shimtet. Kodang aso tulusang tetsübutsü Goliath-i Israel nunger ajak mezüngmeshia ayimoktsü, idangji David-ia ayimoktsü, ” na kü dangi nok, nü aser sangja bener arur, saka nibo nai sensatsüba Israel sepai telok Tsüngrem, temeranger Kibuba tenüng nung nü dangi arur. Tanü Kibubai na kü ket nung bandanga agütsütsü aser ni nü dak azüktsü aser ni nü kolak lepdoktsütsü aser Filistia nunger telok tasümang ni anüng ozü nem aser alima arem shiruru nem agütsütsü, iba jagi alima ajaki Israel nung Tsüngrem ka lir ta metettsü.” ( 1 Samuel 17 : 45 -46.) Tsüngrem dak amangertem rongnung Tsüngrem denbo teti takok lir ta amanga jembiba jangratemtsü aser tasü aittsü oji David-i Goliath dang ashiba o ya asütsü. David-i Goliath ajuruba mapang ya pa tila tanur ka dang süaka, pai aso tulu Goliath ket nung raraba nok, nü, lasang aser jong amer raratsü ayongzükbaji jangjaa reprangteta liasü. Pai Goliath-i koda Israel Tsüngrem atalaa ayimoktsü,item o ajakji Davidi angashi. Iba jagi David tali jashia aküm aser Tsüngrem dak tamang ulushi aser raratsü renem. Pai ashiba ama, pa ket nung raraba nok nü kecha mali asü, pai jong maben, saka pa ket nung akaba ajak agi lijak aser long tila pongo liasü. David asoshi Goliath kolak ulubaji tajung liasü, idakjibo pai pa lijak agi melamelaa kashitsü. Ashiko, Goliath kolakji tila asünungbo pa lijak agi mekashitsü ta arendaka bilemlaa akok. Iba kasaji asenok asoshi tebilemtsü kobateka ulua arur, iba tekaji asenok tamang ulur. Saksaka akoktsüa akok mesüra zübazübaa akoktsüa akok, saka Tsüngremi pa nem takok agütsütsü ta Davidi amanga liasü. Iba tamang jagi pai takok angu. Pai takok anguba jagi Israel nunger alima tsüngdang mak asütsüba mapa tulu nungi kümzük aser Israel nungertemi David den Tsüngrem adenba metet. Timtem aser tetsübutsü lendong ka majangiang aser mekoktetiang nisung ka nüngtugu akümtsü makok, aser iba takokji Tsüngrem dak amangba nungi arur. Tsüngrem dak amangeri teti ni akoktsü ta bilemer saka mamangertemi teti makoktsü ta bilemer. Aji oda, Laishiba nung David o Goliath na otsü yagi Khristan-tem tamang jenjang sayur. Asenoki asensasa tebilemtsütem akoktsü merangra teti tasü mait bilemtsü. Aji oda, Israel nungertemi Goliath asoajen tuluba tuluba küma tetsübutsüka anguba ama, anogo shia asen jakdang tebilemtsü tuluba tuluba arur ama angutsü. Ajisüaka, shirnoki Tsüngrem dak jungjunga amangdir, Laishibai ashir, ” Tsüngrem denbo ajak takoktsü.” Filipi 4:13.