Tsüngrem medeni takok anguba

Alima nung nisungtemi anguba takok ajak ya Tsüngrem nungibo masü. Aji oda, Sayutsüngir tapu 8 tekong 14 nung yamai ashir, “oda temeshipur nisung dak tamajung inyaker dak ama ataloker aser ano nisung tamajunger dak temeshi pur dak ataloker ama ataloker.” Tetezü alima nung asenoki temeshipurtema ta bilemba purtem kanga timtema angur saka nisung tamajung shirnoki nisung tepseter, auyar aser rakzükratemer parnokjiang temeshi pur nem moatsür ama jangratema azükarua aliba angur. Aji oda, asenoki aseni inyakba aser aginüba mapatem nung Tsüngrem dang nungi takok aser tajangzükjiang tuluba kümdaktsüra, atangji takok angutsü aser tajangzüka alitsü. Ajisüaka, item takok aser tajangzüktemji Tsüngrem maden anguba takoktem asütsü. Nisung asoshi shitak mesükba lenmang ka lir saka tatembangji tasüba ta asüba temoatsü aser takoktemji itemji asütsüa akok. Iba jagi kasa Sayutsüngir tapu nung ashir, “oda Tsüngrem tsübuba pur shiri Pa dang tsübur, parnok jungküm saka tamajunger asoshi asaktsü.” Ibaji alima nung Tsüngrem tsüburtem asoshi anisüngzük o aser Tsüngrem metsüburtem atema tekümdangtsü o asütsü. Atangji, tanü asen lima nung nisung aika tiyazü jembia pei mapa nung takok angur, rakzükratema takar akümer aser tashiyim agi yimten mapa nung takok angur. Item takok ajakji asenoki Tsüngremi moatsüba takoka ta bilemer, anungji tamajung mapa inyaker takok anguba takoktem ajak asoshi asenoki Tsüngrem nem tenüngsang agütsür. Nisung kar tepseter mesüra yirutsür takok anguba, nisung kar temulung jashidaktsür takar akümba, ochimashi mapa kar ajanga takok angubatem asoshi Tsüngrem nem tenüngsang agüja sarasadembaji Pai agizüktsü asü? Tsüngrem medeni takok anguba nung lendong lir ta metetertem alima tanishirtem rongnung Mosa-a ka liasü. Anungji, Tsüngremi kodang Pa dang Egypt lima nungi Israel nungertem aniteta anir aotsü nungloktsü, Mosai Tsüngrem dang ashi, ” item nübortem anir oang ta nai kü dang ashir, ajisüaka kü den shiba yoktsü ajibo nai kü dang mashir…. nü tatenba onok den marura, onok yang nungi anir touma.” Anitet 33:12 & 15.” Kibubai langzü, “Kü tatenba nü den aotsü,” Anitet 33:14. Asen den Tsüngrem lir ta züngzünga meteter inyakba aser takok angubaji jangratemtsüka lir. Tanü asenok anema alitsüa akok mesüra mapa ajak nung takok aser tajangzüka ngua alitsü akok, ajisüaka item takok aser tajangzüktemji Tsüngrem adenba agi anguba masütsüa akok. Aji oda, asenok dangi aruba temoatsütemji kong nungi aruar, itemji jangjatsübaji kanga tongtibang lir. Ashiko, nai Tsüngrem masü saka rongsen arishiba agi tajangzük anguba asütsüa akok mesüra Tsüngremi mulungba masü saka nai mulungbalen alima konang bushiba agi takok angu asütsüa akok. Ajisüaka, Mosai ashiba ama, asen jakdang aser asen meketa aliba tsükchirtem madak takok nguyonga oaka mesüra mamatzü aser ninang mojitzü talubosa alidak Kanan lima tashiji tonga oaka, Tsüngrem tatenba medenra amajok ta asenoki metettsübaji kanga tongtibang lir. Tsüngrem medeni anguba takokji takok masü, ibaji asen tenük agi ngua alima tsüngdang samatsüba mapatem lir. Tanü asenoki nisung tamajungertem aika rongsen aser alima yimten tashi madak jangratema aliba angutsü, ajisüaka Tsüngrem medeni anguba rongsen aser tajangzüktem jagi asenok dangi memenui teraksa aser tebilemtsü khuret tulu bener arutsü. Atangji, takok aser temoatsü ajakji Kibuba nungi arur, anungji asenoki Pa dang meshir. Aji oda, tanü asen akaba rongsen, takok aser maongka ajak ya shitakba Tsüngremi agütsüba temoatsü asü masü ta reprangdangtsübaji kanga tongtibang asütsü. Asen kidang Tsüngremi memulungba rongsen ayuba agi aser Tsüngremi memulungba tashi amshiba agi tarutsü senmangertem kangshidaktsütsü agibo, tanü Tsüngremi mulungba inyakba temoatsü agi tarutsü senmangertem anisüngzüka lidaktsü tajungba asütsü.