Tsüngrem mesüra God? : Mathi 6:25-34

“Sen meimbaji tamajung tera ajak lir…, nai item nungi jenang, aser temeshiba Tsüngrem tsübuba, tamang, temeim, taremzük, ajemlu, item anidaka oang.” (1 Tim. 6:10, 11).

Asangur kati Yisu dangi arua pai Tsüngrem ozüng ajak pa lanuwa nungi shidak benshiogo ano pa kechi nüngdaker ta asüngdang. Yisui ashi, “Na tabensa kümnera, oang, na kechi aka aji ajak sensaker nem agüjang, aser na kotak nung rongsen akatsü, aser arung, Kü sülen anitakang.” (Mt. 19:20, 21). Saka asangurji jashir oadok.

Tanü asüng sen meimba lendong kanga ajema sayutsüngir. Yisui aiben iba indang jembi. Tenyar Yohani “Alima aser yangji aliba oset temeim. Kari alima meimra Tebu temeim pa dak mali.” (1 Yn. 2:15). ashidang pai pa o meyoktepa mejembi. Pauli tatem anogo nung arutsüba timtem ashi dang pai mezüngbuba “pei meimba” aser “sen meimba” zülu (2 Tim. 3:1, 2). Kasa mapang asenoki Tsüngrem aser sen meimtsü makok. Asenoki ka meimtsü aser ka sempatsü (Mt. 6:24). “God” Israel kin ter ana rongnung kin tenüng ka koba tetezü “tia tajung!” Asenoki Tsüngrem mesüra Gad meim/agitsü akok, anaprongji masü!

Tamil nunger shin o ka nung ashir, sen atema süra tasümang tashi katia tebang lapoktsü! Tanela nung shirnok tasü lir parnok asoshi ibai shidak asütsü. Parnok temenen nung süa lir saka asenok temenen tsütsü aser alima yimya nung tasü lir. Asenoki temalen aliba oset nung tenük yokdi (Kol. 3:1, 2). Azüapung aser memerükbaji süngyanglu külemba lir (t. 5). Asenoki aji tepsettsüla.

Takar akümtsü jangrabaji yimya saka asenoki aji nokdangtsüla (A. Shin 23:4). Temeshiba aser temulung süa alibaji tajangzük tulu lir Kechiaser asenoki alimai kecha bener maru aser kecha bener maotsü. Chiyongtsü aser aben süoshi lira asenoki idakji temulung süa lidi.” (1 Tim. 6:6-8). Mother Teresa sari ana aser tzü ataba pungdang ka den temulung süa ali, aser Mahatma Gandhi tuluba jenjang mebushi saka tangar dang nungi tuluba pai India asoshi inyak. John Wesleyi ashi, “Nüktapangta aser nisung tepseter noktangba ama alima nung rongsen rezüngtsü asenok Master ajanga nokdanger!” Sen meimba jagi asen taküm sentong ajak arakmoker aser tajangzük makai kümdaktsür (Lk. 8:14). Asenok peria kara tanüngbaji shirnok maka parnok nem agüjang!

“Alima mapa tajung kwika den asenok sendaka lir, itemji asenok nungi bener mao tashi asenoki mangatetter!”

 (St. Augustine, 354-430).