Tsüngrem o nung tepelatsü

Asen lima nung yimsüsür tematiba ato kilonser mesüra tir nungi asen dangi züluba shidi ka arununga asenoki pelashishia agizüker, iba shidiji meindoki teti atema rezünga ayutsü. Ibaji mesüka Tsüngrem nungi asen dangi osang ka arunungbo, ano ibajibo alima yimsüsür nungi aruba osang dang nungi kanga agia tepelatiba aser sentiba asütsü. Iba kasa tepelaji Yerimia 15:16 nung Yerimiai Tsüngrem dang ” nü otem ngua ni itemji achi, aser nü otemji ni asoshi tepelatsü aser kü mulung asoshi jangratemtsü aküm,” ta shia angur. Atangji, koba tia nung lia Tsüngrem nungi tejembiba  o arudir aruaka, ibaji tepelatsü aser temoatsü asütsü. Atangji, alima nung alir asünungji, khen khen asenoki mekoktettsüsa tensa tia ajurur. Iba amaji Yisu alima nung taküm alidanga, ken mapang ka Mary aser Martha natia tenu Lazar sür mangyim jashi tia ajuru. Iba asüama takoksa tia ajuruba jagi tena sasa tenati teimla aser tesünep menguteti mangyima liasü. Iba mapang nung Yisu arur o ka ashi, ” Lazar adokang,” (Yohan 11: 43), idangji Lazar tasü nungi shia aru. Iba jagi Mary aser Martha na asoshi dang masü saka yangji alirtem ajak atema tepelatsü o ka liasü. Atangji, Yisui ashiba o ajakbo pelatsüsa masütsüa akok saka Pa o angaba nung tepelatsü lir. Khen khenbo Yisui par nütsüngtem arüja metongshitsü. Mathi 16:23 nungbo, Yisui par nütsüngtem rongnunga tongtibangtiba nisung Peter dang satan ta ajaba angutsü. Iba amaji Pai aiben pa nütsüngtem metongshitsüba angutsü. Item otemji angatsübo tejashitsüka amai angar. Ajisüaka, Yerimiai ashir, Tsüngrem o agi taküm nung tepela bener arur. Tsüngremi asenok teti repranger aser jembir, anungji pa o angashitsüsa alitsübaji asenok mapa lir.. Aji oda, Tsüngremi asenok den jembitsüsa asenoki taochi angubaji koda tepelatsü. Pai asenok mulung nung jembiba agi, asenok taküm aser kibong raksatsütsü temenen tatidang arua aliba ajak koktetter. Tsüngremi jembiba o ji tenüngsang o asütsüa akok mesüra tarütsüba o asütsüa akok , koba amala o südir süang, iba o jagi asenok taküm melenshidaktsütsü aser tepela angutsü. Aji oda, kodangsa asenoki Tsüngrem külema sarasademdir, Tsüngremi asenok den jembitsü ta imlaseta amanga asenoki sarasademtsüla. Aji oda, kodangsa asenoki Laishiba lapoka züngdir, idangjia Tsüngremi asenok den jembitsü ta imlaseta asenoki azüngtsüla. Iba amaji asenok sarasademba mapang asenoki Tsüngrem dang ashiba otem dang nungibo Tsüngremi asenok den jembiba otemjiang tongtibangba asütsü. Aji oda, Tsüngrem dang nei kechi ashitsü ta asüba dang nungibo Tsüngremi kü dang kechi shiner ta asüba tsütsüjiang tenarong tentsü tajungba lir. Aiben asenoki sarasademba mapang, Tsüngrem dang asen nüngdak ajak meshijen meshia jembir. Atangji, Tsüngrem ket nung asenok nüngdak ajak lir, anungji Pa dang meshitsübaji tim. Ajisüaka, asenoki asen nüngdak meshia sarasadem dang Tsüngremia asen dang kechi shinür ta angadangtsübaji mamatsüla. Asenok tashi tasen aser tepela angutsübajibo Tsüngremi jembiba o nungi dang angutsü. Ibaji asenoki angashitsü aser angatettsüsa asenok alitsübaji kanga toingtibang asütsü. Tarütsüba o asütsüa akok mesüra tenüngsang o asütsüa akok, koba o südir süang Tsüngrem nungi asen dangi aruba o jagi asen taküm len anitsü aser asenok mulung peladaktsütsü.